राष्ट्रावादीतील हालचाली वाढल्या ! लवकरच होणार मोठा फेरबदल, पुढे काय घडणार ?

राष्ट्रवादी काँग्रेसमध्ये लवकरच मोठे फेरबदल होण्याची शक्यता असल्याची माहिती समोर आली आहे. पक्षाच्या संघटनात्मक रचनेत बदल करण्याची तयारी सुरू असून, राज्यासाठी दोन कार्याध्यक्ष नेमले जाण्याची चर्चा आहे.

मिळालेल्या माहितीनुसार, विदर्भ आणि मराठवाड्यासाठी एक कार्याध्यक्ष, तर उर्वरित महाराष्ट्रासाठी दुसरा कार्याध्यक्ष नेमण्याची तयारी सुरू आहे. त्यामुळे पक्षाच्या आगामी संघटनात्मक बदलांकडे राजकीय वर्तुळाचे लक्ष लागले आहे. या नव्या रचनेत विभागनिहाय जबाबदारी देऊन पक्षाचा विस्तार आणि संघटन मजबूत करण्याचा प्रयत्न केला जाण्याची शक्यता आहे. यामुळे स्थानिक पातळीवरील कार्यकर्त्यांना अधिक जबाबदारी मिळण्याची शक्यता व्यक्त केली जात आहे.

दरम्यान, पक्षातील फेरबदलानंतर सुनेत्रा पवार आणि पार्थ पवार राज्याचा दौरा करणार असल्याची माहिती सूत्रांकडून मिळत आहे. या दौऱ्यादरम्यान पक्षाच्या संघटनात्मक कामाचा आढावा घेतला जाण्याची शक्यता आहे. तसेच विविध भागांतील पदाधिकारी आणि कार्यकर्त्यांशी संवाद साधला जाऊ शकतो. आगामी निवडणुकांच्या पार्श्वभूमीवर या दौऱ्याला विशेष महत्त्व प्राप्त झाले आहे.

राष्ट्रवादी काँग्रेसमधील या संभाव्य बदलांमुळे पक्षाची पुढील रणनीती काय असेल, याबाबत उत्सुकता निर्माण झाली आहे. मात्र, या फेरबदलांबाबत पक्षाकडून अधिकृत घोषणा झालेली नाही. त्यामुळे आगामी काळात नेमके कोणते निर्णय घेतले जातात, याकडे सर्वांचे लक्ष लागले आहे.