पुणे : शरद पवार यांनी कोरेगाव भीमा हिंसाचारप्रकरणातली (Koregaon Bhima) सर्व कागदपत्रे आयोगासमोर सादर करावीत. तपास अधिकाऱ्याला नंतर वाचवायला कोणी येणार नाही, त्यामुळे त्याने आत्ताच खरे काय आहे ते सांगावे, असे वंचित बहुजन आघाडीचे नेते प्रकाश आंबेडकर (Prakash Ambedkar) यांनी म्हटले आहे. राष्ट्रवादीचे अध्यक्ष शरद पवार यांनी कोरेगाव भीमा आयोगासमोर आज साक्ष होती. तर या हिंसाचारप्रकरणी संभाजी भिडे यांना पुणे ग्रामीण पोलिसांनी क्लीनचीट दिली, त्यानंतर ते बोलत होते. एकूणच संभाजी भिडे यांच्या प्रकरणावरून त्यांनी राष्ट्रवादीच्या नेत्यांवर टीका केली. ते म्हणाले, की राष्ट्रवादीतले अनेक नेते हे संभाजी भिडे यांच्या पाया पडताना दिसतात. जो माणूस संभाजी भिडे (Sambhaji Bhide) यांच्या पाया पडतो, तो त्यांना वाचवण्याचा प्रयत्न करत आहे. असे एनसीपीमध्ये एक नाही अनेक आहेत हे सगळ्यांना माहिती आहे, असा हल्लाबोल त्यांनी केला आहे. तसेच हे नेते कोण आहेत, हे चौकशीत समोर येईल, असे ते म्हणाले.