Pune : बँक ऑफ इंडियाच्या इमारतीत अचानक आग; चौथ्या मजल्यावर धुराचे लोट, अग्निशमन दलाकडून युद्धपातळीवर बचावकार्य सुरू

पुण्यातून एक मोठी बातमी समोर येत आहे. शहरातील सगुणा चौकाजवळील बँक ऑफ इंडियाच्या इमारतीच्या चौथ्या मजल्यावर आज आग लागली आहे. या घटनेमुळे परिसरात काही काळ खळबळ उडाली आहे. आगीची माहिती मिळताच तात्काळ अग्निशमन दलाला पाचारण करण्यात आले.

अग्निशमन दलाच्या सहा गाड्या घटनास्थळी दाखल झाल्या असून, अग्निशमन दलाचे जवान युद्धपातळीवर आगीवर नियंत्रण मिळवण्याचे काम करत आहेत. बँकेच्या चौथ्या मजल्याला आग लागल्याने, त्यातून मोठ्या प्रमाणात धूर बाहेर येत असल्याचे चित्र आहे. सध्या आगीचे कारण अस्पष्ट असले तरी, अग्निशमन दलाचे जवान परिस्थिती नियंत्रणात आणण्यासाठी अथक प्रयत्न करत आहेत. या घटनेमुळे परिसरात एकच गर्दी झाली होती. कोणतीही जीवितहानी झाली नसल्याची प्राथमिक माहिती आहे, पण आग विझवण्याचे काम अजूनही सुरू आहे.