संतप्त शेतकऱ्यांची नार्वेकरांच्या सहकाऱ्याला मारहाण!
महाराष्ट्र विधानसभा अध्यक्ष राहुल नार्वेकर पुन्हा एका वादात सापडले आहेत. अलिबाग येथील महात्रोळी गावात एका जमीन प्रकरणी त्यांच्यासोबत असलेल्या व्यक्तीला शेतकऱ्यांनी मारहाण केली. नार्वेकरांनुसार ते वाद सोडवण्यासाठी गेले होते, तर संजय राऊत यांनी गुजराती व्यावसायिकासाठी जमीन मोजणीचा आरोप केला आहे.
महाराष्ट्र विधानसभा अध्यक्ष राहुल नार्वेकर एका व्हिडिओमुळे पुन्हा वादाच्या भोवऱ्यात सापडले आहेत. अलिबागच्या महात्रोळी गावात एका जमीन वादातून त्यांच्यासोबत आलेल्या एका व्यक्तीला स्थानिक शेतकऱ्यांनी मारहाण केली. या घटनेमुळे राजकीय वर्तुळात आरोप-प्रत्यारोपांना सुरुवात झाली आहे.
नार्वेकरांच्या म्हणण्यानुसार, ते स्थानिक शेतकऱ्यांमधील जमिनीचा वाद सोडवण्यासाठी घटनास्थळी गेले होते. मात्र, शेतकऱ्यांनी त्यांच्या उपस्थितीतच त्यांच्या सहकाऱ्याला मारहाण केली. या घटनेनंतर नार्वेकर काहीही न बोलता घटनास्थळावरून निघून गेल्याचे व्हिडिओमध्ये दिसते.
दुसरीकडे, शिवसेना (उद्धव बाळासाहेब ठाकरे) नेते संजय राऊत यांनी या घटनेला वेगळे वळण दिले आहे. राऊत यांच्या आरोपानुसार, राहुल नार्वेकर एका गुजराती व्यावसायिकासाठी फार्महाऊस करण्याच्या उद्देशाने जमीन मोजणी अधिकाऱ्यांसह महात्रोळी गावात गेले होते. जमीन मालक लग्नानिमित्त बाहेर असताना त्यांच्या शेतात घुसून मोजणी सुरू केल्याचा आरोप राऊत यांनी केला आहे. या प्रकारामुळे संतप्त शेतकऱ्यांनी नार्वेकरांच्या सहकाऱ्याला मारहाण केल्याचे राऊत यांचे म्हणणे आहे.
