Mahayuti : महायुतीतील अंतर्गत मतभेद पुन्हा चव्हाट्यावर; आधी सत्तेतून बाहेर पडा, मग… महेंद्र थोरवेंचं तटकरेंना थेट आव्हान

रायगड जिल्ह्यात महायुतीमधील अंतर्गत मतभेद पुन्हा एकदा समोर आले आहेत. टोरंट कंपनीच्या प्रकल्पाला विरोध करण्याच्या मुद्द्यावरून हा वाद उफाळून आला असून, यावरून स्थानिक राजकारण तापले आहे. शिवसेनेचे (शिंदे गट) आमदार महेंद्र थोरवे यांनी राष्ट्रवादी काँग्रेसचे (अजित पवार गट) नेते सुनील तटकरे यांना थेट आव्हान दिले आहे.

महेंद्र थोरवे यांच्या मते, टोरंट प्रकल्पाला केंद्र सरकारने आणि मुख्यमंत्री देवेंद्र फडणवीस यांनी मंजुरी दिली आहे. जर सुनील तटकरे, जे स्वतः सत्तेत सहभागी आहेत आणि ज्यांची कन्या राज्याच्या मंत्रीमंडळात आहे, ते या सरकारी प्रकल्पाला विरोध करत असतील, तर त्यांनी आधी सत्तेतून बाहेर पडावे आणि मग विरोध करावा. थोरवे यांनी तटकरेंना लढायला तयार असल्याचेही सांगितले.

या आरोपांवरून अनिकेत तटकरे यांनी महेंद्र थोरवे यांच्या वक्तव्याला फारसे गांभीर्याने घेण्याची गरज नसल्याचे म्हटले आहे. अनिकेत तटकरे यांनी थोरवे यांच्या भूमिकेवर प्रश्नचिन्ह उपस्थित करत, त्यांना “घटकेत घोड्यावर, तर घटकेत गाढवावर” असे संबोधले. ते म्हणाले की, गेल्या आठवड्यात झालेल्या DPDC बैठकीत थोरवे हे सुनील तटकरे यांना साहेब, साहेब करत होते आणि आता अचानक काय झाले हे समजू शकले नाही. यावरून, थोरवे यांच्या भूमिकेत सातत्य नसल्याचे अनिकेत तटकरे यांनी दर्शवले. यामुळे रायगडमधील महायुतीच्या नेत्यांमधील दुरावा स्पष्टपणे समोर आला आहे.