Rajan Patil : ‘राष्ट्रवादीत निष्ठेला महत्त्व नाही’, ‘हे’ 3 तीन आमदार भाजपात जाणार! सोलापुरात दादांना मोठा धक्का

सोलापूर जिल्ह्यातील अजित पवार यांच्या नेतृत्वाखालील राष्ट्रवादी काँग्रेस पक्षाला मोठा धक्का बसण्याची शक्यता आहे. स्थानिक स्वराज्य संस्थांच्या निवडणुकांपूर्वी भाजप राष्ट्रवादीला कमकुवत करण्याच्या प्रयत्नात असल्याचे दिसत आहे. सोलापूरमधील राष्ट्रवादीचे तीन माजी आमदार – राजन पाटील, यशवंत माने आणि बबनदादा शिंदे – भाजपमध्ये प्रवेश करण्याच्या तयारीत असल्याची चर्चा राजकीय वर्तुळात सुरू आहे. बबनदादा शिंदे यांचे पुत्र रणजितसिंह शिंदे यांनी या संदर्भात मुख्यमंत्री देवेंद्र फडणवीस यांची भेट घेतल्याचेही वृत्त आहे.

या संभाव्य पक्षबदलाच्या पार्श्वभूमीवर, राष्ट्रवादी काँग्रेसने तातडीने डॅमेज कंट्रोल सुरू केले आहे. मंत्री दत्तात्रय भरणे सोलापूर दौऱ्यावर असून, त्यांनी शहर आणि ग्रामीण विभागातील नेत्यांच्या स्वतंत्र बैठका घेतल्या आहेत. पक्ष सोडून जाण्याबद्दलच्या चर्चा केवळ गैरसमज असल्याचे भरणे यांनी म्हटले आहे, आणि हे गैरसमज दूर करण्याचा प्रयत्न केला जाईल, असे आश्वासन दिले आहे. यावर राजन पाटील यांनी “पक्षात बेशिस्तपणा वाढला आहे आणि पक्षनिष्ठेला किंमत राहिलेली नाही, म्हणूनच आम्ही पक्ष सोडण्याचा विचार करत आहोत”, असे म्हटले आहे.