Sangli : पाटलांचा बैलगाडा अन् सांगलीत राडा, लाखोंचा सहभाग करोडोंच्या बक्षीसांसह रंगला थरार..फॉर्च्युनर, थार अन् 150 बाईक्स

सांगली जिल्ह्यातील तासगावात आयोजित करण्यात आलेल्या बैलगाडा शर्यतीला अभूतपूर्व प्रतिसाद लाभला. ठाकरे गटातून शिंदे गटात आलेल्या चंद्रहार पाटील यांनी या स्पर्धेचे आयोजन केले होते. या स्पर्धेला देशातील सर्वात मोठी बैलगाडा शर्यत असे संबोधले जात आहे. या स्पर्धेतील विजेत्यांसाठी कोट्यवधी रुपयांची बक्षीसे ठेवण्यात आली होती, ज्यात दोन फॉर्च्युनर कार, दोन महिंद्रा थार, सात ट्रॅक्टर्स आणि दीडशे मोटरसायकल्सचा समावेश होता.

फॉर्च्युनर कारची किंमत 40 ते 60 लाख रुपये, तर थारची किंमत 14 ते 25 लाख रुपये असल्यामुळे एकूण बक्षीसांचे मूल्य प्रचंड होते. बकासूर, हरण्या, मथुर आणि पिस्तुल्या यांसारख्या प्रसिद्ध बैलांनी स्पर्धेत सहभाग घेतला. या स्पर्धेसाठी तासगाव तालुक्यातील बोरगाव येथे 500 एकर विस्तीर्ण मैदान तयार करण्यात आले होते, जिथे लाखोंच्या संख्येने स्पर्धक आणि प्रेक्षक उपस्थित होते.

उपमुख्यमंत्री एकनाथ शिंदे यांच्यासह अनेक राजकीय नेत्यांनी या कार्यक्रमाला हजेरी लावली. आगामी स्थानिक निवडणुकांच्या तोंडावर चंद्रहार पाटील आणि शिंदे गटाचे हे शक्तीप्रदर्शन मानले जात आहे.