प्रकाश सुर्वे यांच्या दहीहंडी उत्सवात संजय दत्त यांची उपस्थिती, अपना भाई है म्हणत…

प्रसिद्ध चित्रपट अभिनेते संजय दत्त यांनी यंदा प्रकाश सुर्वे यांच्या वतीने आयोजित दहीहंडी उत्सवाला खास उपस्थिती लावली. यावेळी, संजय दत्त यांनी प्रकाश सुर्वे यांचे “अपना भाई जैसा है” असल्याचे म्हटले आणि गरिबांसाठी केलेल्या त्यांच्या कार्याचे कौतुक केले. या वर्षीच्या दहीहंडीचा मुख्य विषय मराठी भाषा आणि मराठी शाळा वाचवणे हा होता, ज्याला संजय दत्त यांनी आपला पूर्ण पाठिंबा दर्शवला. यावेळी प्रकाश सुर्वे यांनी संजय दत्त यांच्याविषयी आपले मनोगत व्यक्त केले. ते म्हणाले की संजय दत्त केवळ एक अभिनेते नसून, ते अत्यंत दिलदार व्यक्ती आहेत. दर महिन्याला करोडो रुपये गरिबांना दानधर्म करतात आणि वैद्यकीय मदतीची गरज असलेल्यांना ते तत्परतेने साहाय्य करतात.

गरीब आणि अडचणीत असलेल्यांना मदत करण्याची त्यांची वृत्ती खूप मोठी आहे, असे सुर्वे यांनी नमूद केले. दोन्ही मान्यवरांनी एकमेकांबद्दल आदर व्यक्त केला. संजय दत्त यांनी यापुढेही प्रकाश सुर्वे यांच्या आवाहनावर कार्यक्रमांना उपस्थित राहण्याचे आश्वासन दिले. शेवटी, संजय दत्त यांनी देशवासियांना हर हर महादेव आणि जय हिंद असा संदेश दिला.