Sanjay Raut : राज्याच्या राजकारणात काय घडतंय, त्याची गंमत बघायची; संजय राऊतांचं सूचक विधान, राजकीय वर्तुळात चर्चांना उधाण

शिवसेना (उद्धव बाळासाहेब ठाकरे) नेते संजय राऊत यांनी महाराष्ट्राच्या सध्याच्या राजकीय परिस्थितीवर भाष्य करताना भारतीय जनता पक्षावर जोरदार टीका केली आहे. कोणत्याही पदासाठी पक्षाच्या दारात जाऊन उभे राहणार नाही, असे त्यांनी स्पष्ट केले. तसेच, शरद पवार यांच्याविषयी बोलताना, त्यांच्या आयुष्याची तपश्चर्या ते मातीमोल करणार नाहीत, असे राऊत यांनी नमूद केले.

राऊत यांच्या मते, भाजपला महाराष्ट्रात आणि देशात अडचणी आल्या की अशा प्रकारच्या अफवा पसरवल्या जातात. राज्याला भेडसावणाऱ्या बेरोजगारी, महागाई, दुष्काळ आणि शेतकरी आत्महत्या यांसारख्या गंभीर प्रश्नांवर चर्चा करण्याची गरज त्यांनी व्यक्त केली. हिंगोलीमध्ये लक्ष्मीपूजनाच्या दिवशी एका शेतकऱ्याने आत्महत्या केल्याचा दाखला देत, यावर कोणी बोलणार का, असा सवाल त्यांनी विचारला.

संजय राऊत यांनी ठामपणे सांगितले की, “मूळात शिवसेना एक आहे, दोन नाही.” उद्धव ठाकरे यांच्या नेतृत्वाखालीच शिवसेना कार्यरत आहे. दोन राष्ट्रवादी काँग्रेस कधीच नव्हत्या आणि शरद पवारांच्या नेतृत्वाखालील राष्ट्रवादी काँग्रेस ही मूळ आहे. विलीनीकरणाचा प्रश्नच उद्भवत नाही, असे त्यांनी स्पष्ट केले. सर्वोच्च न्यायालयाचा निकाल आपल्या बाजूनेच लागेल असा विश्वास त्यांनी व्यक्त केला.