Sanjay Raut : लोकशाहीचाच मेंदू चोरण्याचा प्रयत्न; संजय राऊतांचा निवडणूक आयोगावर घणाघात, फडणवीसांनाही केले थेट सवाल

शिवसेना (उद्धव बाळासाहेब ठाकरे) नेते संजय राऊत यांनी निवडणूक आयोग आणि महाराष्ट्राचे मुख्यमंत्री देवेंद्र फडणवीस यांच्यावर तीव्र शब्दांत टीका केली आहे. राऊत यांनी दावा केला की, लोकशाहीचाच मेंदू चोरण्याचा प्रयत्न केला जात आहे.

राऊत यांनी मुख्य निवडणूक आयुक्तांवर थेट आरोप करत त्यांना अमित शहांचा एजंट आणि भ्रष्ट असे संबोधले. ते म्हणाले की, निवडणूक आयुक्तांनी लोकशाहीची हत्या केली आहे. फडणवीस निवडणूक आयोगाची बाजू का घेत आहेत, असा प्रश्न राऊत यांनी उपस्थित केला. ते फडणवीसांना उद्देशून म्हणाले की, निवडणूक आयोग एक स्वतंत्र संस्था असताना तुम्ही त्यांचे वकील का बनत आहात? याचा अर्थ तुम्ही काहीतरी लपवत आहात आणि निवडणूक आयोगाच्या मदतीने घोटाळे केले आहेत, असा आरोप राऊत यांनी केला.

या संदर्भात राहुल गांधींव्यतिरिक्त इंडियन एक्सप्रेसनेही हा विषय मांडला होता, असे राऊत यांनी सांगितले. इंडियन एक्सप्रेसने निवडणूक आयोगाला एक्सपोज केल्याचे ते म्हणाले.