Sanjay Raut Vs Navnath Ban | संजय राऊतांचा अमित शाहांवर फंड कलेक्शनचा आरोप; नवनाथ बन यांचा सडेतोड पलटवार, मुंबई दौऱ्यावरून वार- पलटवार सुरूच

केंद्रीय गृहमंत्री अमित शाह यांच्या मुंबई दौऱ्यावरून महाराष्ट्राच्या राजकारणात सध्या तीव्र आरोप-प्रत्यारोप सुरू आहेत. शिवसेना (उद्धव बाळासाहेब ठाकरे) नेते संजय राऊत यांनी शाह यांच्या मुंबई भेटीमागे फंड कलेक्शनचा प्रमुख उद्देश असल्याचा गंभीर आरोप केला आहे. राऊत यांच्या मते, अमित शाह मुंबईत बिल्डर्स आणि जमिनीचे व्यवहार करणाऱ्या लोकांकडून मोठ्या प्रमाणात पैसे गोळा करतात. मुंबई महानगरपालिकेतूनही मोठ्या निधीची वसुली होते, ज्यामुळे भाजपला पाठबळ मिळते, असा दावा त्यांनी केला. गृहमंत्री म्हणून गणेशोत्सवासारख्या सणांच्या काळात शाह यांनी मुंबईतील भेटी कमी कराव्यात, असे मतही राऊत यांनी व्यक्त केले.

संजय राऊत यांच्या या आरोपांवर भाजप नेते नवनाथ बान यांनी जोरदार पलटवार केला आहे. अमित शाह मुंबईत आल्यावर राऊतांना इतके पोटात का दुखते, असा सवाल बान यांनी केला. अमित शाह हे देशाचे गृहमंत्री असून, मुंबई काय पाकिस्तानमध्ये नाही किंवा ती कोणाची जहागीर नाही, असे बान यांनी सुनावले. अमित शाह यांना देशातील कोणत्याही राज्यात जाण्याचा पूर्ण अधिकार आहे. याउलट, उद्धव ठाकरे, आदित्य ठाकरे आणि संजय राऊत हे मात्र घरात बसूनच कर्तृत्व गाजवत असल्याचा टोला नवनाथ बान यांनी लगावला. या शाब्दिक युद्धामुळे मुंबईतील राजकीय वातावरण तापले आहे.