शिंदे गटाची धाकधूक वाढली! कपिल सिब्बल यांच्या जोरदार युक्तीवादाला सुरुवात, कोर्टात काय काय घडतंय?
शिवसेना पक्ष आणि चिन्हांवरील सर्वोच्च न्यायालयातील सुनावणीला सुरुवात झाली आहे. कपिल सिब्बल ठाकरे गटाच्या वतीने आमदार अपात्रतेवर युक्तिवाद करत आहेत. निवडणूक आयोगाच्या भूमिकेवर त्यांनी प्रश्नचिन्ह उपस्थित केले असून, एकनाथ शिंदे यांचे मुख्यमंत्रीपद बेकायदेशीर ठरवले आहे. देवदत्त कामतही युक्तिवाद करण्याची शक्यता आहे.
सर्वोच्च न्यायालयात शिवसेना पक्ष आणि चिन्हावरील महत्त्वपूर्ण सुनावणीला सुरुवात झाली आहे. ठाकरे गटाचे वकील कपिल सिब्बल यांनी आज आमदार अपात्रतेवर युक्तिवाद केला. सिब्बल यांनी यापूर्वी पक्षाची घटना, राजकीय पक्ष आणि विधिमंडळ पक्ष यांच्यातील फरकावर जोरदार युक्तिवाद केला होता. आज त्यांनी निवडणूक आयोगाच्या भूमिकेवर गंभीर प्रश्नचिन्ह उपस्थित केले.
केवळ संख्याबळाच्या आधारावर एकनाथ शिंदे यांना मुख्यमंत्रीपदी बसवणे बेकायदेशीर होते, असा युक्तिवाद सिब्बल यांनी केला. आयोगाने पक्षाची घटना किंवा माहितीची शहानिशा न करता निर्णय घेतल्याचे त्यांनी कोर्टासमोर मांडले. सिब्बल यांच्या युक्तिवादाचा हा सलग चौथा दिवस आहे. त्यांनी निवडणूक आयोगाने घेतलेले निर्णय चुकीचे असल्याचे म्हटले आहे. आयोगाला पक्षाची घटना लोकशाहीवादी आहे की नाही हे ठरवण्याचा अधिकार पॅरा १५ अंतर्गत नसल्याचे सिब्बल यांनी नमूद केले. यानंतर ठाकरे गटाचे वकील देवदत्त कामत युक्तिवाद करण्याची शक्यता आहे. या सुनावणीत काय होतं हे पाहणं महत्त्वाचं ठरेल.
