उद्धव ठाकरे गणेश महासंघ कार्यालयाच्या भेटीला, छत्रपती संभाजीनगरात मोठ्या हालचाली
उद्धव ठाकरे छत्रपती संभाजीनगर दौऱ्यावर असून, त्यांनी गणेश महासंघ कार्यालयाला भेट दिली. यावेळी त्यांनी श्री गणरायाचे दर्शन घेऊन स्थानिक पदाधिकाऱ्यांशी चर्चा केली. त्यानंतर ते मराठवाड्यातील प्रश्नांवर सुरू असलेल्या आंदोलनात सहभागी होणार असून, कार्यकर्त्यांना मार्गदर्शन करणार आहेत.
छत्रपती संभाजीनगरमध्ये उद्धव ठाकरे यांचा दौरा सुरू असून, त्यांनी आज शहरातील गणेश महासंघ कार्यालयाला सदिच्छा भेट दिली. गणेश मंडळांसोबत चर्चा करण्यासाठी आणि गणरायाचे दर्शन घेण्यासाठी ते या कार्यालयात पोहोचले. यावेळी त्यांनी स्थानिक पदाधिकाऱ्यांशी संवाद साधला. काल मराठवाडा मुक्ती संग्राम दिनानिमित्त हुतात्मा स्मारकास अभिवादन केल्यानंतर आज त्यांचा मुक्काम छत्रपती संभाजीनगरमध्ये आहे.
गणेश महासंघ कार्यालयाच्या भेटीनंतर उद्धव ठाकरे हे शिवसेना (उद्धव बाळासाहेब ठाकरे) पक्षाच्या आंदोलनात सहभागी होण्यासाठी विभागीय कार्यालयाकडे रवाना झाले. गेल्या दोन आठवड्यांपासून अंबादास दानवे यांच्या नेतृत्वाखाली मराठवाड्यातील विविध समस्या आणि प्रश्नांवर हे आंदोलन सुरू आहे. आज या आंदोलनाचा समारोप उद्धव ठाकरे यांच्या उपस्थितीत होत असून, ते आंदोलकांना मार्गदर्शन करतील. त्यानंतर शासकीय विश्रामगृहात पत्रकार परिषद घेऊन ते आपली सविस्तर भूमिका मांडणार आहेत.
