विदर्भ! गुंतवणुकीचं नवं डेस्टिनेशन; मुख्यमंत्र्यांकडून महत्त्वपूर्ण घोषणा

विदर्भ महाराष्ट्रातील गुंतवणुकीचे नवे डेस्टिनेशन म्हणून उदयास येत आहे. मुख्यमंत्री देवेंद्र फडणवीस यांनी नागपूरमध्ये आयोजित खासदार औद्योगिक महोत्सवात विदर्भातील अनेक महत्त्वाच्या गुंतवणूक प्रकल्पांची माहिती दिली. नागपूरमध्ये महिंद्रा कंपनी १५ हजार कोटी रुपयांची गुंतवणूक करून ऑटोमोबाईल प्रकल्प उभारणार आहे, ज्यात ईव्ही आणि नेक्स्ट जनरेशन वाहनांचे उत्पादन होईल, तसेच ट्रॅक्टर निर्मितीही अपेक्षित आहे. या प्रकल्पातून २०२८ पासून उत्पादन सुरू होण्याची शक्यता आहे.

टाटा एरोस्पेस नागपूरमध्ये सेंटर ऑफ एक्सलन्स स्थापन करणार आहे. औद्योगिक विकासासाठी नागपूरमध्ये आणखी पाच हजार हेक्टर जमीन लवकरच संपादित केली जाईल. अमरावतीमध्ये आशियातील सर्वात मोठे एव्हिएशन स्कूल निर्माण केले जात आहे, ज्याचे उद्घाटन जुलैमध्ये होईल. गडचिरोली येथे विमानतळाचे काम सुरू असून ते गेटवे टू साऊथ इंडिया म्हणून विकसित केले जाईल. याशिवाय, भंडारा जिल्ह्यातील वैनगंगा नदीला बुलढाणा जिल्ह्यातील नळगंगा नदीशी जोडणारा महाराष्ट्रातील सर्वात मोठा नदीजोड प्रकल्प विदर्भात साकारणार आहे. यामुळे मोठ्या प्रमाणात रोजगार निर्मिती होईल आणि या प्रदेशाच्या आर्थिक विकासाला गती मिळेल.