LPG Cylinder Price : 1 एप्रिलपासून गॅस सिलेंडर महाग? इराण-इस्त्रायल-अमेरिका युद्धाने वाढवले टेन्शन

LPG Cylinder price from 1st April: इराण-इस्त्रायल आणि अमेरिका युद्ध अजून काही महिने लांबण्याची शक्यता आहे. अमेरिकेन सैनिक आखातात उतरले आहेत. तर देशात पुढील दोन महिने पुरेल इतका इंधन आणि गॅस साठा असल्याचा दावा केंद्र सरकारने केला आहे. केंद्रीय पेट्रोलियम मंत्री हरदीप सिंह पुरी यांनी देशात लॉकडाऊन लागण्याच्या चर्चा फेटाळल्या आहेत. सरकारपुढे असा कोणताही प्रस्ताव नसल्याचे त्यांनी स्पष्ट केले. पण युद्ध लांबल्यास 1 एप्रिलापासून खरंच गॅस सिलेंडरच्या किंमती वाढणार का? याची काळजी नागरिकांना लागली आहे.

संकटाशी दोन हात

केंद्र सरकारने स्पष्ट केले आहे की, सध्याची जागतिक स्थिती पाहता देशात इंधन अथवा इतर अत्यावश्यक वस्तूंची कोणतीही कमी नाही. मंत्रालयानुसार, भारताकडे तेल आणि गॅसचा मुबलक साठा आहे. पुढील 60 दिवसांची तयारी अगोदरच पूर्ण करण्यात आली आहे. याशिवाय भारत आता 41 हून अधिक देशांकडून कच्चे तेलाची आयात करत आहे. त्यात होमूर्ज स्ट्रेटचा कोणताही अडथळा नाही. पण तरीही गॅस एजन्सीसमोरील रांगा कमी झालेल्या नाहीत. तर अनेक पेट्रोल पंप बंद पडले आहेत. जिथे पेट्रोल-डिझेल उपलब्ध आहेत, त्या पेट्रोल पंपावर गर्दी झाली आहे.

LPG सिलेंडर महाग होणार?

सध्या इराण-इस्त्रायल आणि अमेरिकेतील तणाव निवळण्याची चिन्हं कमी आहेत. आखातातील तणावाचा परिणाम पेट्रोल-डिझेलसह नैसर्गिक गॅसवर होण्याची शक्यता आहे. त्यामुळे 1 एप्रिल, 2026 रोजी एलपीजी गॅस ग्राहकांना झटका बसण्याची शक्यता वर्तवली जात आहे. अर्थात केंद्र सरकारकडून याविषयीचे कोणतेही अधिकृत वृत्त, वक्तव्य आलेले नाही. तेल वितरण कंपन्या (OMCs) प्रत्येक महिन्याच्या पहिल्या तारखेला गॅसच्या किंमतींची समीक्षा करते. मध्यपूर्वेतील तणाव आणि तेल संकटादरम्यान कच्चे तेल आणि गॅस किंमतीत मोठी वाढ होण्याची शक्यता आहे. त्यामुळे येत्या एक तारखेला ग्राहक खरंच एप्रिल फुल होतात की खिशाला झळ बसते हे समोर येईल.

मार्च 2026 रोजी घरगुती गॅस सिलेंडरच्या किंमतीत 60 रुपयांची वाढ झाली. आता गॅस सिलेंडरच्या किंमती 853 च्या जवळपास आहे. प्रत्येक शहरानुसार या किंमतीत आणि कर्मचारी वाहतूक खर्च जोडत असल्याने फरक जाणवतो. व्यावसायिक गॅसच्या किंमतीही वधारल्या आहेत. तर त्यांचा मोठा तुटवडाही समोर आला आहे. इराण युद्धामुळे  LPG सोबतच CNG आणि PNG च्या किंमतीत 1 एप्रिलपासून मोठ्या बदलाची शक्यता आहे.