Sangli Baby Found : सांगलीतील अपह्रत बाळ सापडले, रुग्णालयातील नर्सनेच केले कृत्य
सीसीटीव्ही फुटेजच्या आधारे पोलिसांनी आरोपीचा शोध घेत बाळासह आरोपी महिलेला शेणोली स्टेशनवरुन ताब्यात घेतले आहे. बाळ सुखरुप आहे. एलसीबी, विटा व तासगावच्या पोलिसांनी संयुक्तिकरित्या ही कारवाई करत अवघ्या 8-9 तासात बाळाचा शोध घेत आरोपीला अटक केले.
सांगली : तासगाव येथील डॉ. अंजली पाटील यांच्या हॉस्पिटलमधून रविवारी सकाळी अपहरण (Kidnapped) झालेले एक दिवसाचे बाळ (Baby) अखेर सापडले आहे. हॉस्पिटलमधील एका नर्सनेच हे बाळ पळवले होते. विशेष म्हणजे दोनच दिवसांपूर्वी ही नर्स हॉस्पिटलमध्ये रुजू झाली होती. अपहरणाची सर्व हॉस्पिटलमधील सीसीटीव्ही (CCTV) कॅमेऱ्यात कैद झाली होती. सीसीटीव्ही फुटेजच्या आधारे पोलिसांनी आरोपीचा शोध घेत बाळासह आरोपी महिलेला शेणोली स्टेशनवरुन ताब्यात घेतले आहे. बाळ सुखरुप आहे. एलसीबी, विटा व तासगावच्या पोलिसांनी संयुक्तिकरित्या ही कारवाई करत अवघ्या 8-9 तासात बाळाचा शोध घेत आरोपीला अटक केले. आरोपी महिलेने हे कृत्य का केले याची पोलीस चौकशी करत आहेत.
दोन दिवसांपूर्वीच नर्स म्हणून रुजू झाली होती आरोपी महिला
तासगाव येथे सिद्धेश्वर मंदिर चौकात डॉ. अंजली पाटील यांचे रुग्णालय असून, सदर रुग्णालयात दोनच दिवसापूर्वी आरोपी महिला नर्स म्हणून रुजू झाली होती. रुजू होताना महिलेने आपली सर्व कागदपत्रे एक-दोन दिवसात सादर करते असे डॉक्टरांना सांगितले होते. तसेच आपण जुळेवाडी येथील रहिवासी असून सध्या तासगावात राहत असल्याची खोटी माहितीही दिली. डॉक्टरांनी तिच्यावर विश्वास ठेवत तिला कामावर घेतले. याच दवाखान्यात चिंचणी येथील एक महिला प्रसुतीसाठी दाखल झाली होती. शनिवारी या महिलेची प्रसुती झाली होती. रविवारी सकाळी आरोपी नर्स डिलिव्हरी वॉर्डमध्ये गेली आणि या बाळाला घेऊन हॉस्पिटलच्या बाहेर आली. त्यानंतर बाळाला काखेतील पर्समध्ये टाकून पसार झाली. या घटनेने तासगावसह जिल्हाभरात खळबळ उडाली होती.
सीसीटीव्ही फुटेजच्या आधारे आरोपीचा शोध
याप्रकरणी तासगाव पोलिसात माहिती देण्यात आली. त्यानुसार तासगावचे डीबी पथक तात्काळ दवाखान्यात हजर झाले. रुग्णालयातील स्टाफची चौकशी करत पोलिसांनी तेथील सीसीटीव्ही फुटेज तपासले. सीसीटीव्ही फुटेजवरुन पोलिसांनी खबऱ्यांना अॅक्टिव्ह केले. दर महिला शेणोली स्टेशनवर असल्याची गोपनीय माहिती खबऱ्याद्वारे पोलिसांना मिळाली. त्यानुसार विटा येथील वाहतूक पोलिसांनाही अलर्ट करण्यात आले. पोलीस पथकाने तात्काळ शेणोली स्थानकावर धाव घेत बाळासह महिलेला ताब्यात घेतले. बाळाला आई-वडिलांच्या ताब्यात देण्यात आले असून महिलेला तासगाव पोलीस ठाण्यात आणण्यात आले आहे. पोलीस तिची कसून चौकशी करत आहेत. (A day old baby kidnapped from a hospital in Sangli has been found)
