बिअर घेण्यासाठी आला आणि मोबाईल घेऊन गेला, अखेर पोलिसांच्या जाळ्यात अडकला !

डोंबिवली / सुनील जाधव : एका बिअर शॉपमध्ये बिअर घेण्याच्या बहाण्याने आलेल्या चोरट्याने दुकान मालकाचा 70 हजाराचा मोबाईल चोरुन पळ काढल्याची घटना डोंबिवली ठाकुर्ली चोळेगाव परिसरात घडली. याप्रकरणी रामनगर पोलिसांनी एका तासात सीसीटीव्हीच्या आधारे चोरट्याचा पाठलाग करत ठाकुर्ली परिसरातून बेड्या ठोकल्या. विवेक कुमार श्याम बिहारी श्रीवास्तव असे या आरोपीचे नाव असून, हा आरोपी फिरस्ता आहे. दुकानात दुकानदार एकटा असल्याची संधी साधत दुकानात वस्तू घेण्याच्या बहाण्याने जाऊन दुकानदाराला अवघड ठिकाणी ठेवलेल्या वस्तू देण्यास सांगायचा. मग दुकानदाराची पाठ फिरताच काउंटरवर असलेला दुकानदाराचा मोबाईल आणि अन्य महागड्या वस्तू रोख रक्कम लंपास करायचा.

दुकानदाराचा मोबाईल चोरुन पोबारा

ठाकुर्ली चोळेगाव परिसरात राहणारे पदमाकर चौधरी यांचे लव कुश बिअर शॉप आहे. शुक्रवारी रात्री 11 वाजण्याच्या सुमारास त्यांच्या दुकानात विवेक कुमार हा बिअर घेण्याच्या बहाण्याने आला होता. त्याने पद्माकर यांची नजर चुकवत काऊंटरवर असलेला त्यांचा 70 हजार रुपये किंमतीचा मोबाईल चोरुन तेथून पळ काढला. बिअर न घेता ग्राहक परत गेल्याने तसेच काऊंटरवर मोबाईल नसल्याची बाब लक्षात येताच पद्माकर यांनी रामनगर पोलीस ठाण्यात धाव घेतली.

पोलिसांनी एका तासात ठोकल्या बेड्या

पोलिसात मोबाईल चोरीला गेल्याची तक्रार दाखल केली. दाखल तक्रारीनुसार रामनगर पोलीस ठाण्याचे वरिष्ठ पोलीस निरिक्षक सचिन सांडभोर यांच्या मार्गदर्शनाखाली गुन्हे शाखेचे सहाय्यक पोलीस निरिक्षक योगेश सानप, विशाल वाघ, नितीन सांगळे यांच्या पथकाने पोलिसांनी चोरीस गेलेल्या मोबाईलचा आणि आरोपीच्या घटनास्थळावरील सीसीटिव्ही फुटेज तपासत चोरट्याचा शोध सुरु केला.

एका तासात पोलिसांनी चोरट्याचा ठाकुर्ली परिसरात शोध घेत त्याचा पाठलाग करत त्याला ताब्यात घेतले. त्याच्याकडील चोरी केलेला 70 हजार रुपये किंमतीचा मोबाईल पोलिसांनी हस्तगत केला. सध्या या आरोपीला पोलिसांनी ताब्यात घेतले असून, पोलिसांच्या माहितीनुसार हा आरोपी एक सराईत चोरटा असून, दुकानात एकटे असलेल्या दुकानदारांना टार्गेट करायचा. सध्या पोलिसांनी तीन गुन्हे उघडकीस आणले आहेत. आणखी किती ठिकाणी अशा प्रकारच्या चोऱ्या केल्या आहेत?, त्याचा कुणी साथीदार आहे का? याचा तपास रामनगर पोलीस करत आहेत.