Crime Stroy : मुलीला वाचवण्यासाठी आईने घेतली विहीरीत उडी, मुलगी बचावली, पण आईचा…
विहीरीत मुलगी पडली, धाडसी आईने मारली उडी, मुलीनं कडा पकडून ठेवला...
बुलढाणा – शेतातील विहिरीमध्ये (Field wells) पाणी काढताना तोल गेल्याने 14 वर्षीय मुलगी विहीरीत पडली. दरम्यान क्षणाचाही विलंब न करता मुलीला वाचविण्यासाठी धाडसी आईने (Mother) थेट विहिरीत उडी घेतली. परंतु दुर्दैवाने खोल तळाशी जाऊन अडकल्यामुळे या घटनेत आईचा दुर्दैवी मृत्यू (death) झाला.
मुलगी सुदैवाने वाचली, कारण मुलीने विहिरीत पडल्यावर कडा पकडून ठेवला होता. ही गंभीर घटना खामगाव तालुक्यातील कोंटी येथे घडली आहे. बेबीबाई उमा खताळ असं मृत आईचे नाव आहे.
बेबीबाई खताळ ह्या आपल्या मुलीला घेऊन सकाळी शेतात गेल्या होत्या. दरम्यान 14 वर्षीय कुमारी आकांक्षा ही विहीरीवर पाणी काढण्यासाठी गेली. अचानक तिचा तोल जाऊन ती पाण्यात पडली. मुलगी पाण्यात पडल्याचे लक्षात येताच आई बेबीबाई यांनी मुलीला पाण्यातून बाहेर काढण्याचा आटोकाट प्रयत्न केला.
परंतु मुलगी पाण्यात खोलवर बुडत असल्याचे पाहून कुठलाही विचार न करता आई बेबीबाई उमा खताळ विहिरीत उडी घेतली. पाणी खोल असल्यामुळे त्या पाण्याच्या तळाशी गेल्या. यात त्यांचा बुडून मृत्यू झाला. दरम्यान मुलगी आकांशाने विहिरीतील कडा पकडून ठेवल्याने ती सुदैवाने वाचली. या घटनेने सर्वत्र हळहळ व्यक्त होत आहे.
