कर्तृत्वाने सांभाळला गावचा कारभार, पण सासुरवासाची ठरली शिकार; महिला सरपंचाची विष पिऊन आत्महत्या
मयत योगीता फापाळे यांचा भाऊ संतोष गवळी यांनी बहिणीच्या आत्महत्येला सासरच्यांना जबाबदार धरले आहे. आपली बहिण सरपंच झाल्यापासून तिला सतत सासरची मंडळी कोणत्या ना कोणत्या कारणावरुन मानसिक व शारिरीक त्रास देत होती.
लासलगाव : सतत कोणत्या ना कोणत्या कारणावरुन सासरच्यांकडून होत असलेला मानसिक व शारीरिक छळ आणि चारित्र्यावर संशय घेणे यामुळे कंटाळून एका महिला सरपंचाने विषारी औषध प्राशन करुन आत्महत्या केल्याची घटना निफाड तालुक्याती मरळगोई गावात घडली आहे. योगीता अनिल फापाळे असे मयत महिलेचे नाव आहे. याप्रकरणी सासरच्या चौघांविरुद्ध लासलगाव पोलिसात गुन्हा दाखल करण्यात आला आहे.
सरपंच पद ठरले छळवणुकीचे कारण
कन्नड तालुक्यातील मकरंदपूर गावातील योगीता फापाळे यांचा आठ वर्षापूर्वी 2013 मध्ये निफाड तालुक्यातील अनिल फापाळे यांच्याशी विवाह झाला होता. त्यांना एक मुलगा व एक मुलगी अशी दोन अपत्ये देखील आहेत. योगीता फापाळे यांचा पती अनिल फापाळे हा शेतकरी आहे. तीन वर्षांपूर्वी 2018 मध्ये ग्रामपंचायत निवडणुकीत योगीत फापाळे या निवडून आल्या होत्या. त्यांची मरळगोई खुर्द ग्रामपंचायतच्या सरपंच पदी निवड करण्यात आली होती. गेली तीन वर्षे त्या सरपंच पदाची जबाबदारी चोखपणे पार पाडत होत्या. मात्र हे सरपंद पदच त्यांच्या छळवणुकीला आणि मृत्यूला कारणीभूत ठरल्याचे माहेरच्यांच्या तक्रारीवरुन कळते.
विषारी औषध प्राशन करुन आत्महत्या
मयत योगीता फापाळे यांचा भाऊ संतोष गवळी यांनी बहिणीच्या आत्महत्येला सासरच्यांना जबाबदार धरले आहे. आपली बहिण सरपंच झाल्यापासून तिला सतत सासरची मंडळी कोणत्या ना कोणत्या कारणावरुन मानसिक व शारिरीक त्रास देत होती. तसेच तिच्या चारित्र्यावरही सासरचे संशय घेत होते, असे संतोष गवळी यांनी आपल्या फिर्यादीत म्हटले आहे. या त्रासाला कंटाळूनच योगीता यांनी आत्महत्येसारखे टोकाचे पाऊल उचलले. योगीता यांनी मंगळवारी रात्री साडे आठच्या सुमारास विषारी औषध प्राशन केले. यानंतर तात्काळ पती अनिल फापाळे याने योगीता यांना लासलगाव येथील खाजगी रुग्णालयात दाखल केले. मात्र डॉक्टरांनी तिला मृत घोषित केले.
सासरच्या चौघांविरुद्ध गुन्हा दाखल
याप्रकरणी मयत योगीता फापाळे यांच्या भावाने दिलेल्या तक्रारीनुसार सासरे बाबासाहेब फापाळे, पती अनिल बाबासाहेब फापाळे, सासू सरला फापाळे आणि दिर प्रदिप फापाळे या चौघांविरुद्ध लासलगाव पोलीस ठाण्यात भादवी 306, 323, 504, 506, 34 अन्वये गुन्हा दाखल केला आहे. पुढील तपास सहाय्यक पोलीस निरीक्षक राहुल वाघ यांच्या मार्गदर्शनाखाली पोलीस उपनिरीक्षक रामकृष्ण सोनवणे करीत आहेत. (Female Sarpanch commits suicide due to domestic violence)
इतर बातम्या
परदेशात नोकरीचे आमिष दाखवून फसवणूक केल्याप्रकरणी किरण गोसावीला अटक
चारित्र्यावर सतत संशय घेत असल्याने सूनेकडून सासऱ्याची कु्ऱ्हाडीने वार करुन हत्या
