Gondia Four Missing : गोंदियात नाल्यात चार जण पाण्याच्या प्रवाहात वाहून गेले, चौघांचा शोध सुरु

गोंदिया : गोंदिया जिल्ह्यात सध्या पावसा (Rain)ने थैमान घातले असून जिल्हातील नदी, नाले ओसंडून वाहत आहेत. अनेक ठिकाणी रस्त्यावरील वाहतूक पूल वाहून गेले आहेत. याच दरम्यान अंघोळीसाठी गेलेली चार मुले पुरा (Flood)च्या पाण्यात वाहून गेल्याची घटना गोंदिया शहरातील गौतम नगर येथे घडली आहे. जावेद अली हजरत अली सय्यद (24) आणि बाबा उर्फ रेहान कलीम शेख (15) यांच्यासह अन्य दोन मुले पुराच्या पाण्यात वाहून गेली. पुराच्या पाण्यात बुधवारी सायंकाळी 4 वाजण्याच्या दरम्यान हे चौघे बेपत्ता (Missing) झाले आहेत. अद्याप मुलांचा शोध लागला नसून, जिल्हा आपत्ती व्यवस्थापनाकडून शोध कार्य सुरु आहे.

पोहायला गेले असता वाहून गेले

गोंदिया शहर पोलीस स्टेशन अंतर्गत गौतम नगर येथील चौथा नाला येथे चार जण आंघोळीला गेले असताना बेपत्ता झाले आहेत. जिल्हा आपत्ती व्यवस्थापनाकडून चौघांचे शोध कार्य सुरू आहे. जिल्ह्यामध्ये मुसळधार पाऊस सुरु आहे. सतत कोसळणाऱ्या पावसामुळे नदी, नाले मोठ्या प्रमाणावर वाहत आहेत. अशा ठिकाणी पोहायला, अंघोळीला जाऊ नये, अशा ठिकाणी सेल्फी घेण्याचा नाद सोडून द्यावा, तसेच वाहत्या पाण्यातून वाहने काढू नये असे आवाहन जिल्हाधिकारी नयना गुंडे यांनी केले आहे.

नांदेडमध्ये आसना नदीच्या पुरात एक जण वाहून गेला

नांदेडमध्ये आज सांयकाळच्या सुमारास एक जण पुरातून जाण्याचा प्रयत्न करताना वाहून गेला आहे. पासदगाव इथल्या आसना नदीच्या पुरातून नांदेडकडे एक जण येत होता. यावेळी तो पुरात वाहून गेलाय, कासारखेडा गावातील रहिवाशी असलेला विलास हिंगोलेच्या शोधासाठी एसडीआरएफचे एक पथक घटनास्थळी बोटीसह दाखल झाले आहेत. विशेष म्हणजे त्याला पुरात जाऊ नको असे लोकांनी बजावले होते मात्र त्याने ऐकले नाही. (Four people were swept away by the flow of water in Gondia)