भाच्याचं भांडण मामाच्या जीवावर, चुना मागितल्याने दोन गटात राडा, हाणामारीत मामाचा मृत्यू
जितेंद्र खामकर आणि विकास कुंभार या दोघांमध्ये तंबाखूसाठी चुना मागितल्याच्या कारणावरुन रात्री मारामारी झाली. हा वाद मिटवण्यासाठी जितेंद्रने मामा अनिल रामचंद्र बारड यांना बोलावून घेतलं होतं.
कोल्हापूर : भाच्याचं भांडण सोडवताना झालेल्या हाणामारीत मामाला प्राण गमवावे लागले. कोल्हापूर (Kolhapur) जिल्ह्यात राधानगरी तालुक्यातील धामडमध्ये हा धक्कादायक प्रकार घडला. तंबाखूसाठी चुना मागितल्याच्या कारणावरुन दोन गटात राडा (Ruckus) झाला होता. वादाचं रुपांतर हाणामारीत झाल्यानंतर एका व्यक्तीचा जागीच मृत्यू झाला. अनिल रामचंद्र बारड (वय 47 वर्ष) असं मयत व्यक्तीचं नाव आहे. कुंभारवाडी भागात मध्यरात्रीच्या सुमारास ही घटना घडली. या प्रकरणी राधानगरी पोलिसात गुन्हा (Crime) दाखल करण्यात आला आहे. आरोपीला पोलिसांनी ताब्यात घेतलं असून अधिक तपास सुरु आहे.
काय आहे प्रकरण?
जितेंद्र खामकर आणि विकास कुंभार या दोघांमध्ये तंबाखूसाठी चुना मागितल्याच्या कारणावरुन रात्री मारामारी झाली. हा वाद मिटवण्यासाठी जितेंद्रने मामा अनिल रामचंद्र बारड यांना बोलावून घेतलं. अनिल बारड हे कोल्हापूर जिल्हा संघात गोकुळ शिरगांव शाखेत मॅनेजर म्हणून काम करत होते.
मामावर धारदार चाकूने दोनदा वार
रात्री अकरा वाजताच्या सुमारास मामा-भाचा दोघं जण कुंभारवाडी येथे गेले. त्यावेळी आरोपी विकास कुंभार याने जवळ असलेल्या धारदार चाकूने अनिल बारड यांच्यावर दोन वेळा वार केल्याचा आरोप आहे. अनिल मामा यांना उपचारासाठी कोल्हापूरला नेले जात होते, मात्र अर्ध्या रस्त्यातच त्यांचा मृत्यू झाल्याची माहिती आहे.
आरोपी विकास कुंभार याला राधानगरी पोलिसांनी ताब्यात घेतले आहे. या प्रकरणाचा आधिक तपास पोलीस निरीक्षक एस. एस. कोळी आणि पोलिस उपनिरीक्षक विजयसिंह घाडगे करत आहेत.
संबंधित बातम्या :
लग्नाचं प्रपोजल नाकारल्याचा राग, भरबाजारात तरुणीवर हल्ला, बघ्यांमुळे जीव गमावला
बायको घराबाहेर पडताच पाठलाग, शेतात नेऊन पतीकडून निर्घृण हत्या
