Dombivali Crime : रात्रीच्या वेळी रस्त्यावरुन जात असताना कलाकाराला लुटले, 24 तासात चोरटा जेरबंद
डोंबिवलीत चोरट्यांचा सुळसुळाट सुरु आहे. रस्त्यावरुन जाणाऱ्या नागरिकांनाही चोरटे टार्गेट करत आहेत. मारहाण करत लुटण्याच्या घटना उघडकीस येत आहेत.
डोंबिवली / 1 सप्टेंबर 2023 : डोंबिवलीत लूटमारीच्या घटना थांबण्याचे नावच घेताना दिसत नाहीत. रात्रीच्या वेळी रस्त्यावरुन चालत जात असताना एका ज्युनिअर आर्टिस्टला डोळ्यात स्प्रे मारुन लुटल्याची घटना उघडकीस आली आहे. याप्रकरणी महात्मा फुले पोलिसात तक्रार दाखल करण्यात आली. विजय अग्रवाल असे लुटण्यात आलेल्या कलाकाराचे नाव आहे. पोलिसांनी 24 तासाच्या आत लुटपाट करणाऱ्या सराईत चोरट्याला उल्हासनगरमधून बेड्या ठोकल्या आहेत. शाहिद लतीफ शेख उर्फ छोटा बेरिंग असे आरोपीचे नाव असून, त्याच्यावर कल्याण परिसरात 7 पेक्षा अधिक गुन्हे दाखल आहेत. भररस्त्यात घडणाऱ्या या घटनांमुळे नागरिकांच्या सुरक्षेचा प्रश्नही ऐरणीवर आला आहे.
ज्युनिअर अभिनेता विजय अग्रवाल हा गुरुवारी रात्री 12.30 वाजण्याच्या सुमारास कल्याण पश्चिममेतील एकविरानगर येथे घरी चालला होता. यावेळी संतोषीमाता रोडवर सहजानंद चौकाजवळ एका अनोळखी माणसाने त्याचा मोबाईल मागितला. अभिनेत्याने मोबाईल देण्यास नकार दिला. यानंतर आरोपीने अभिनेत्याच्या डोळ्यात स्प्रे मारत त्याला मारहाण केली आणि त्याच्या खिशातील मोबाईल काढून पोबारा केला.
याप्रकरणी अभिनेत्याने महात्मा फुले पोलीस ठाण्यात धाव घेत तक्रार दाखल केली. कल्याण महात्मा फुले पोलीस चौकीचे सीनियर पी आय अशोक होनमाने, क्राईम पी आय प्रदीप पाटील यांच्या नेतृत्वाखाली एपीआय किरण भिसे, पोलीस हवालदार सुजित टिकेकर, जितेंद्र चौधरी, रामेश्वर गामने, अनंता कागरे, सूर्यवंशी, दीपक थोरात, शिपटे यांचे एक पथक तयार करत तपास सुरू केला.
या पथकाला गुप्त बातमीदाराकडून मिळालेल्या माहितीवरुन उल्हासनगर परिसरात सापळा रचून आरोपीला ताब्यात घेतले. आरोपी सराईत गुन्हेगार असून, महात्मा फुले बाजारपेठ आणि खडकपाडा पोलीस ठाण्यात त्याच्यावर 7 पेक्षा अधिक गुन्हे दाखल आहेत.
