मुंबईत 61 वर्षीय महिलेची आत्महत्या, सातव्या मजल्यावरुन उडी घेत आयुष्य संपवलं

मुंबई : 61 वर्षीय वृद्धेने राहत्या घरातून उडी मारुन आत्महत्या केल्याची धक्कादायक घटना उघडकीस आली आहे. बोरिवली पूर्व भागातील उंच इमारतीच्या सातव्या मजल्यावरुन तिने उडी मारली. महिलेच्या आत्महत्येचं नेमकं कारण अद्याप अस्पष्ट आहे.

61 वर्षीय माया जयशंकर सिंह यांनी आत्महत्या केली. मुंबईतील बोरिवली पूर्व भागातील मागाठाणे परिसरात ही घटना घडली. संक्रमण शिबिर बिल्डिंग क्रमांक 4 A मध्ये त्या राहत होत्या. पहाटे सहा वाजण्याच्या सुमारास राहत्या इमारतीच्या सातव्या मजल्यावरुन माया सिंह यांनी खाली उडी मारली.

माया जयशंकर गेल्या काही दिवसांपासून आजारी होत्या. सायन हॉस्पिटलमध्ये त्यांच्यावर उपचारही सुरु होते. माया यांनी आत्महत्या का केली, याचं नेमकं कारण अद्याप अस्पष्ट आहे. कस्तुरबा मार्ग पोलिसांनी अपघाती मृत्यूची नोंद केली आहे. या आत्महत्या प्रकरणाचा पोलीस अधिक तपास करत आहेत.

वसईतील बीचवर नवविवाहितेचा मृतदेह

दुसरीकडे, मॉर्निंग वॉकसाठी घराबाहेर पडलेल्या नवविवाहितेचा मृतदेह आढळल्याची धक्कादायक घटना कालच उघडकीस आली होती. वसईच्या किल्ला बंदर समुद्र किनाऱ्यावर 30 वर्षांच्या महिलेचा मृतदेह सापडला. महिलेची हत्या झाली, तिने आत्महत्या केली, की अपघात झाला, याचा आता पोलीस तपास करत आहेत. मात्र या घटनेमुळे महिलेच्या कुटुंबीयांसह परिसरात एकच खळबळ उडाली आहे.

अवघ्या दोन महिन्यांपूर्वी विवाह

ममता पटेल असे मृतदेह मिळालेल्या विवाहित महिलेचे नाव आहे. ती वसईच्या एव्हरशाईन परिसरातील राहत होती. ती मूळ गुजरातमधील नवसारी येथील रहिवासी होती. अवघ्या दोन महिन्यांपूर्वी तिचा विवाह झाला होता. ममता पटेल गेल्या बुधवारपासून बेपत्ता होती.

मॉर्निंग वॉकला गेल्यापासून बेपत्ता

बुधवार सकाळी सहा वाजता ममता मॉर्निंग वॉक करण्यासाठी घराबाहेर पडली होती. मात्र त्यानंतर ती बेपत्ता झाली होती. याबाबत तुलिंज पोलीस ठाण्यात ती बेपत्ता असल्याची तक्रारही दाखल करण्यात आली होती. मात्र चार दिवसांनंतर तिचा मृतदेह वसईच्या किल्ला बंदर समुद्र किनाऱ्यावर सापडला.

संबंधित बातम्या :

मॉर्निंग वॉकहून परतलीच नाही, वसईतील बीचवर नवविवाहितेचा मृतदेह आढळला

नऊ दिवसांपूर्वीच लग्न, माहेरी येऊन विवाहितेची प्रियकरासोबत आत्महत्या

(Mumbai Borivali 61 years old lady allegedly commits suicide by jumping from high-rise building)