Nashik Crime : दोघांच्या वादात तिसऱ्याचा बळी, मित्रांच्या वादात पडला अन् जीवाला मुकला !

नाशिक / 28 ऑगस्ट 2023 : नाशिकमध्ये हत्येचे सत्र थांबण्याचे नावच घेताना दिसत नाही. दररोज काही ना काही कारणातून हत्याकांड उघडकीस येत आहे. अशीच एक घटना गंगापूर पोलीस ठाण्याच्या हद्दीतील कार्बन नाका परिसरात घडली आहे. शिवीगाळ करणाऱ्या मित्राची बाजू घेतली म्हणून जिगरी दोस्तानेच मित्राची हत्या केल्याची धक्कादायक घटना नाशिकमध्ये घडली आहे. विश्वनाथ सोनवणे असे हत्या झालेल्या तरुणाचे नाव आहे. याप्रकरणी गंगापूर पोलीस ठाण्यात गुन्हा नोंद करण्यात आला आहे. पोलिसांनी दोन संशयितांना ताब्यात घेतले आहे. वाढत्या हत्याकांडामुळे नागरिकांमध्ये भीतीचे वातावरण आहे.

काय आहे प्रकरण?

दोन-तीन दिवसांपूर्वी रफिख शेखला एका मित्राने शिवीगाळ केली होती. यावेळी मयत विश्वनाथने शिवीगाळ करणाऱ्या मित्राची बाजू घेतली होती. याचा राग रफिकच्या मनात खदखदत होता. यानंतर मयत विश्वनाथ सोनवणे, आरोपी समशेर रफिक शेख, दीपक अशोक सोनवणे आणि त्यांचे दोन-तीन मित्र दारु पित गप्पा मारत होते. यावेळी रफिकने इतर मित्रांसह विश्वनाथ याला मारहाण केली. तसेच रागाच्या भरात त्याच्या पोटात चाकू भोसकला. यात तो गंभीर जखमी झाला.

रुग्णालयात तैनात पोलिसाला संशय आला अन्…

जखमी विश्वनाथला आरोपींनी जिल्हा शासकीय रुग्णालयात दाखल केले. मात्र उपचारादरम्यान त्याचा मृत्यू झाला. यावेळी रुग्णालयात तैनात असलेल्या पोलीस हवालदाराच्या सतर्कतेने संशयित आरोपी मित्रांना तात्काळ ताब्यात घेण्यात आले. पोलिसांनी त्यांची कसून चौकशी केली असता दोघांनी रागाच्या भरात हत्या केल्याची कबुली दिली. यानंतर पोलिसांनी दोघांविरोधात गुन्हा दाखल करत अटक केली आहे.