भाजपकडून तिकीट मिळताच कंगनाचं ते ट्विट जोरदार व्हायरल; काय म्हणाली होती कंगना?
अभिनेत्री कंगना रणौत हिला भाजपने हिमाचल प्रदेशातून लोकसभेचं तिकीट दिलं आहे. कंगना हिमाचल प्रदेशातील मंडी लोकसभा मतदारसंघातून लढणार आहे. विशेष म्हणजे मंडी लोकसभा मतदारसंघातून निवडणूक लढवणारी कंगना पहिली बॉलिवूड कलाकार ठरली आहे. कंगनाच्या विरोधात लढण्यास काँग्रेसच्या एका महिला उमेदवाराने नकार दिला आहे. त्यामुळे कंगना विरोधात कोण लढणार? याकडे सर्वांचं लक्ष लागलं आहे.
अभिनेत्री कंगना रणौतला भाजपने हिमाचल प्रदेशातील मंडीमधून तिकीट दिलं आहे. त्यामुळे कंगनाचा अधिकृतपणे राजकारणात प्रवेश झाला आहे. कंगनाची उमेदवारी जाहीर झाल्यानंतर तिचं एक जुनं ट्विट सोशल मीडियातून व्हायरल होत आहे. राजकारणात आल्यानंतर काय करणार आहे? याची माहिती देणारं हे कंगनाचं ट्विट आहे. आपल्या चाहत्यांशी संवाद साधताना कंगनाने हे ट्विट केलं होतं. तिचं हे ट्विट आता तुफान व्हायरल होत असून कंगना बोलल्याप्रमाणेच वागणार का? असा सवाल नेटकरी करताना दिसत आहेत.
कंगना रणौतला भाजपकडून तिकीट जाहीर झालं. त्यानंतर तिने सोशल मीडियावर एक पोस्ट करून आपल्या मनातील भावना व्यक्त केल्या. माझ्या प्रिय देशाला आणि भाजपला मी नेहमीच बिनशर्त पाठिंबा दिला आहे. भाजपच्या नेतृत्वाने माझी जन्मभूमी असलेल्या हिमाचल प्रदेशातील मंडीमधून मला उमेदवारी जाहीर केली आहे. लोकसभा निवडणूक लढवण्याच्या नेतृत्वाच्या निर्णयाचं मी स्वागत करते आणि त्याचं पालन करेल. अधिकृतपणे पक्षात सामील झाल्याने सन्मान झाल्यासारखं वाटतंय. माझ्या मनात नवा उत्साह संचारला आहे. योग्य कार्यकर्ता आणि विश्वासून सेवक बनण्याचा माझा प्रयत्न राहील, असं कंगनाने ट्विटमध्ये म्हटलं आहे.
काय होतं ट्विट?
तीन वर्षापूर्वी एका यूजरने कंगनाला टॅग करून ट्विट केलं होतं. कंगना मंडी लोकसभा मतदारसंघातून पोटनिवडणूक लढवेल, माझं म्हणणं लिहून ठेवा, असं या यूजरने आपल्या ट्विटमध्ये म्हटलं होतं. त्याला कंगनाने उत्तर दिलं होतं. 2019च्या निवडणुकीत मला ग्वाल्हेरचा पर्याय दिला होता. हिमाचल प्रदेशाची लोकसंख्या जेमतेम 60 ते 70 लाख आहे. तिथे कोणी गरीब नाही. तिथे गुन्हे घडत नाहीत. राजकारणात आले तर ज्या राज्यात समस्या आहेत. तिथूनच निवडणूक लढेल. मी त्या मतदारसंघात काम करू शकते आणि राणी बनू शकते, असं कंगनाने ट्विटमध्ये म्हटलं होतं. त्यानंतर एक वर्षानंतर लगेच कंगनाने घुमजाव केलं होतं. भाजपने तिकीट दिलं तर मी मंडीमधून लढायला तयार आहे, असं कंगना म्हणाली होती. त्यानंतर तिला मंडीतून तिकीट देण्यात आलं आहे.
Just two years back when somebody said you will fight elections from mandi.. you said u want a state with complexities u can work on and won’t fight from mandi
now u are eating ur own words 😭 pic.twitter.com/GVJt91faFE
— ح (@hmmbly) March 24, 2024
पहिल्यांदाच मंडीत
मंडी लोकसभा मतदारसंघातून पहिल्यांदाच भाजपने बॉलिवूड कलाकाराला तिकीट दिलं आहे. कोणत्याही राजकीय पक्षाने आतापर्यंत मंडीतून फिल्मी कलाकाराला तिकीट दिलं नव्हतं. काँग्रेसच्या प्रतिभा सिंह यांनी या मतदारसंघातून लढण्यास नकार दिला आहे. त्यामुळे काँग्रेसमधून कंगनाच्या विरोधात कोण लढणार? याकडे सर्वांचं लक्ष लागलं आहे.
