नोव्हेंबरच्या कडाक्याच्या थंडीत माधुरी दीक्षितने रात्री शूट केला होता हा सीन, ठरला सुपरहिट

बॉलिवूडमधील ज्येष्ठ अभिनेते गोविंद नामदेव यांनी आपल्या दमदार अभिनयाने प्रेक्षकांच्या मनात वेगळी ओळख निर्माण केली आहे. खलनायकी आणि नकारात्मक भूमिकांमध्ये त्यांनी अनेक संस्मरणीय व्यक्तिरेखा साकारल्या. ‘बँडिट क्वीन’, ‘सरफरोश’, ‘कुछ कुछ होता है’, ‘सिंघम रिटर्न्स’ आणि ‘प्रेम ग्रंथ’ यांसारख्या चित्रपटांमध्ये त्यांच्या अभिनयाची विशेष चर्चा झाली. मात्र, ‘प्रेम ग्रंथ’मधील त्यांच्या नकारात्मक भूमिकेने त्यांना मोठी ओळख मिळवून दिली.

एका मुलाखतीत गोविंद नामदेव यांनी ‘प्रेम ग्रंथ’मधील माधुरी दीक्षितसोबतच्या शूटिंगच्या आठवणी सांगितल्या. माधुरी दीक्षितसोबत काम करताना सुरुवातीला आपण थोडे अस्वस्थ आणि संकोचलेले होतो अशी कबुली त्यांनी दिली.

कडाक्याच्या थंडीत रात्रभर झाले शूटिंग

‘प्रेम ग्रंथ’मधील माधुरी दीक्षितसोबतचा एक अत्यंत कठीण आणि चर्चेत राहिलेला सीन पुण्याजवळ शूट करण्यात आला होता. गोविंद नामदेव यांच्या आठवणीनुसार, या सीनचे शूटिंग नोव्हेंबर महिन्यातील कडाक्याच्या थंडीत करण्यात आले होते.

सीनमध्ये दिसणाऱ्या हौदामध्ये गरम पाणी भरण्यात आले होते. मात्र, रात्रीच्या थंड वातावरणात पाण्यात उतरून शूटिंग करणे कलाकारांसाठी मोठे आव्हान होते. विशेषतः माधुरी दीक्षितने अशा परिस्थितीतही पूर्ण शूटिंग पार केले.

गोविंद नामदेव यांनी सांगितले की, माधुरीची मेहनत आणि व्यावसायिक दृष्टिकोन पाहून ते त्यांच्यापासून खूप प्रभावित झाले. रात्रीच्या कडाक्याच्या थंडीतही तिने पाण्यात राहून सीन पूर्ण केला. तिच्या कामाप्रती असलेली निष्ठा आणि समर्पण पाहून आपण तिचे चाहते झालो असेही त्यांनी सांगितले.

‘प्रेम ग्रंथ’मध्ये दिग्गज कलाकारांची मांदियाळी

‘प्रेम ग्रंथ’ हा चित्रपट 1996 मध्ये प्रदर्शित झाला होता. या चित्रपटात माधुरी दीक्षितसोबत ऋषी कपूर आणि अनुपम खेर यांच्याही महत्त्वाच्या भूमिका होत्या. गोविंद नामदेव यांनी चित्रपटात नकारात्मक व्यक्तिरेखा साकारली होती.

चित्रपटातील त्यांच्या भूमिकेमुळे त्यांना मोठी प्रसिद्धी मिळाली. त्यानंतर त्यांनी बॉलिवूडमध्ये अनेक वेगवेगळ्या धाटणीच्या भूमिका साकारत आपली स्वतंत्र ओळख निर्माण केली. ‘प्रेम ग्रंथ’ला प्रदर्शित होऊन अनेक वर्षे झाली असली तरी या चित्रपटातील गाणी आणि कलाकारांच्या भूमिका आजही प्रेक्षकांच्या स्मरणात आहेत.