Border 2 OTT Release : सनी देओलचा ‘बॉर्डर 2’ लवकरच ओटीटीवर; कधी अन् कुठे पाहू शकता?

अनुराग सिंह दिग्दर्शित ‘बॉर्डर 2’ हा चित्रपट बॉक्स ऑफिसवर यशस्वी ठरला आहे. 1997 मध्ये प्रदर्शित झालेल्या ‘बॉर्डर’ या चित्रपटाचा हा सीक्वेल आहे. 23 जानेवारी 2026 रोजी सनी देओलचा हा चित्रपट थिएटरमध्ये प्रदर्शित झाला होता. या चित्रपटाला प्रेक्षक-समीक्षकांकडून दमदार प्रतिसाद मिळतोय. शिवाय बॉक्स ऑफिसवर त्याची कमाईसुद्धा चांगली सुरू आहे. यासोबतच चाहते हा देशभक्तीपर चित्रपट घरी बसल्या ओटीटी प्लॅटफॉर्मवरही पाहण्यासाठी उत्सुक आहेत. ‘बॉर्डर 2’च्या ओटीटी रिलीजची अनेकजण प्रतीक्षा करत आहेत. अशातच त्याच्या डिजिटल प्लॅटफॉर्मच्या स्ट्रीमिंगविषयीची माहिती समोर आली आहे.

‘बॉर्डर 2’ ओटीटीवर कधी आणि कुठे पहायला मिळणार?

सनी देओल, वरुण धवन, दिलजीत दोसांझ आणि अहान शेट्टी यांच्या मुख्य भूमिका असलेला हा चित्रपट 2026 या वर्षातील पहिला हिट चित्रपट ठरला आहे. या चित्रपटात भारतातील आणि जगभरातील कमाईत 300 कोटींचा टप्पा पार केला आहे. या चित्रपटाचे स्ट्रीमिंग हक्क नेटफ्लिक्सकडे आहेत. त्यामुळे नेटफ्लिक्स या ओटीटी प्लॅटफॉर्मवर हा चित्रपट स्ट्रीम होणार आहे. येत्या 20 मार्चपासून ‘बॉर्डर 2’ नेटफ्लिक्सवर पहायला मिळेल, अशी माहिती समोर येत आहे. परंतु याबद्दल अद्याप चित्रपटाच्या टीमने किंवा नेटफ्लिक्सने याबाबत अधिकृत घोषणा केली नाही.

‘बॉर्डर 2’चं बॉक्स ऑफिस कलेक्शन

‘बॉर्डर 2’ने प्रदर्शनाच्या पहिल्याच दिवशी 30 कोटी रुपयांचा गल्ला जमवला होता. अॅडव्हान्स तिकिटांची बुकिंग जोरदार झाल्याने त्याचा सकारात्मक परिणाम पहिल्या दिवसाच्या कलेक्शनमध्ये पहायला मिळाला. त्यानंतर पहिल्या आठवड्यात 224.25 कोटी रुपयांची कमाई झाली. दुसऱ्या आठवड्यापर्यंत कमाईचा आकडा 286 कोटी रुपयांवर पोहोचला होता. तिसऱ्या आठवड्यात हा आकडा 300 कोटींच्या घरात जाण्याची शक्यता आहे. या चित्रपटाचं बजेट 275 कोटी रुपये असून बजेटचा हा आकडा कमाईने आधीच पार केला आहे. त्यामुळे यापुढील कमाई ही नफ्यात मोजली जाणार आहे. बॉर्डर 2 हा सनी देओलचा बहुचर्चित आणि बहुप्रतिक्षित चित्रपट होता. त्यामुळे थिएटरमध्ये हा चित्रपट पाहण्यासाठी अनेकजण उत्सुक होते. बॉर्डरचा पहिला भागसुद्धा बॉक्स ऑफिसवर चांगलाच गाजला होता. त्यातील गाणी आजही लोकप्रिय आहेत.