तब्बल 20 वर्षानंतर मोठ्या पडद्यावर पुनरागमन करणार ‘डोरेमोन’, भारतात या दिवशी होणार रिलीज
तब्बल 20 वर्षानंतर मोठ्या पडद्यावर पुनरागमन करणार 'डोरेमोन'. पोस्टर रिलीज होताच चाहत्यांची उत्सुकता शिगेला. भारतात कधी प्रदर्शित होणार?
जगभरातील मुलांच्या आणि प्रौढांच्या मनावर अधिराज्य गाजवणारे लोकप्रिय अॅनिमेटेड पात्र डोरेमोन आता पुन्हा एकदा भारतीय प्रेक्षकांच्या भेटीला मोठ्या पडद्यावर येणार आहे. ‘डोरेमोन द मूव्ही: न्यू नोबिता अँड द कॅसल ऑफ द अंडरसी डेव्हिल’ हा चित्रपट 2 ऑक्टोबर 2026 रोजी देशभरातील चित्रपटगृहांमध्ये प्रदर्शित होणार आहे. विशेष म्हणजे तब्बल 20 वर्षांनंतर डोरेमोनचा चित्रपट भारतीय सिनेमागृहांमध्ये प्रदर्शित होत असल्याने चाहत्यांमध्ये मोठी उत्सुकता निर्माण झाली आहे.
चित्रपटाच्या निर्मात्यांनी गुरुवारी अधिकृत पोस्टर प्रदर्शित करून ही घोषणा केली. तसेच 20 जूनपासून सुरू होणाऱ्या पॉप-कल्चर फेस्टिव्हलमध्ये चित्रपटाच्या प्रचार मोहिमेला सुरुवात होणार असल्याचे सांगण्यात आले आहे. सोशल मीडियावर करण्यात आलेल्या पोस्टनुसार हा चित्रपट हिंदी, तमिळ आणि तेलुगू भाषांमध्ये प्रदर्शित केला जाणार आहे.
मुंबईमध्ये 20 आणि 21 जून रोजी चाहत्यांसाठी विशेष प्रचार आणि फॅन-एंगेजमेंट उपक्रमांचे आयोजन करण्यात येणार आहे. यामध्ये डोरेमोनच्या चाहत्यांना विविध आकर्षक उपक्रमांचा अनुभव घेता येणार आहे.
साहस, मैत्री आणि शोधयात्रेची रोमांचक कहाणी
‘न्यू नोबिता अँड द कॅसल ऑफ द अंडरसी डेव्हिल’ या चित्रपटात नोबिता, डोरेमोन आणि त्यांचे मित्र एका थरारक समुद्राखालील साहसी प्रवासावर निघतात. या प्रवासात त्यांना अनेक आव्हानांचा सामना करावा लागतो. मैत्री, धैर्य, टीमवर्क आणि नवीन गोष्टींचा शोध हा चित्रपटाचा मुख्य गाभा असणार आहे.
चित्रपटाची कथा प्रसिद्ध मंगाकार Fujiko F. Fujio यांच्या लोकप्रिय मंगा मालिकेवर आधारित आहे. त्यांच्या कल्पनाशक्तीने परिपूर्ण कथा आणि अविस्मरणीय पात्रांनी अनेक पिढ्यांतील वाचक व प्रेक्षकांचे मनोरंजन केले आहे.
View this post on Instagram
डोरेमोनची लोकप्रियता आजही कायम
डोरेमोन हे जगातील सर्वाधिक लोकप्रिय अॅनिमेटेड पात्रांपैकी एक मानले जाते. भविष्यातून आलेली, कान नसलेली रोबोटिक मांजर म्हणून त्याची ओळख आहे. नोबिताला मदत करण्यासाठी डोरेमोन आपल्या जादुई गॅझेट्सचा वापर करत असल्याचे या मालिकेत दाखवले जाते. गेली दोन दशके ही मालिका मुलांबरोबरच तरुण आणि प्रौढ प्रेक्षकांचेही मनोरंजन करत आहे.
2 ऑक्टोबर 2026 रोजी प्रदर्शित होणारा हा चित्रपट डोरेमोनच्या चाहत्यांसाठी एक खास पर्वणी ठरणार असून, साहस आणि भावनिक क्षणांनी भरलेला हा प्रवास प्रेक्षकांना नव्या जगाची सफर घडवणार आहे.
