“OTT वर 299 किंवा 499 रुपयांना विकलं जाणं पसंत नाही”; John Abrahamची परखड भूमिका
चित्रपटगृहात प्रदर्शित झाल्याच्या दोन महिन्यांनंतर मे मध्ये जॉनचा 'अटॅक' हा चित्रपट ओटीटीवर (OTT) प्रदर्शित झाला होता. मात्र जॉनची पहिली पसंती ही नेहमीच थिएटर्स असणार असल्याचं त्याने स्पष्ट केलंय. जॉन स्वत: एक निर्माता असून ओटीटीबद्दल त्याची मतं इतर कलाकारांपेक्षा बरीच वेगळी आहेत.
अभिनेता जॉन अब्राहम (John Abraham) लवकरच ‘एक व्हिलन रिटर्न्स’ (Ek Villain Returns) या चित्रपटातून प्रेक्षकांच्या भेटीला येणार आहे. यामध्ये त्याच्यासोबत तारा सुतारिया, अर्जुन कपूर आणि दिशा पटानी यांच्याही भूमिका आहेत. या ॲक्शन-थ्रिलरची निर्मिती एकता कपूरच्या बालाजी मोशन पिक्चर्स आणि भूषण कुमारच्या टी सीरिजने मिळून केली आहे. या चित्रपटाच्या प्रमोशननिमित्त दिलेल्या एका मुलाखतीत जॉन ओटीटीबद्दल व्यक्त झाला. चित्रपटगृहात प्रदर्शित झाल्याच्या दोन महिन्यांनंतर मे मध्ये जॉनचा ‘अटॅक’ हा चित्रपट ओटीटीवर (OTT) प्रदर्शित झाला होता. मात्र जॉनची पहिली पसंती ही नेहमीच थिएटर्स असणार असल्याचं त्याने स्पष्ट केलंय. जॉन स्वत: एक निर्माता असून ओटीटीबद्दल त्याची मतं इतर कलाकारांपेक्षा बरीच वेगळी आहेत. जॉन अब्राहम इंटरटेन्मेंट या बॅनरअंतर्गत त्याने ‘विकी डोनर’, ‘मद्रास कॅफे’ यांसारख्या चित्रपटांची निर्मिती केली.
“एक निर्माता म्हणून मला ओटीटी आवडतं. ओटीटीच्या प्रेक्षकांसाठी चित्रपट बनवायला मला आवडेल. पण एक अभिनेता म्हणून माझी पसंती ती थिएटरलाच आहे”, असं जॉन ‘ई टाइम्स’ला दिलेल्या मुलाखतीत म्हणाला. जॉनने सांगितलं की, लोकांना दर महिन्याला 299 किंवा 499 रुपये देऊन घरी बसून त्यांच्या स्क्रीनवर पाहण्याची कल्पना त्याला आवडली नाही. घरात ओटीटीवर चित्रपट पाहताना मध्येच ते पाहणं थांबवलं किंवा बंद केलेलं त्याला आवडत नाही. मी एक मोठ्या पडद्याचा नायक आहे आणि मला तिथेच राहायचं आहे, असं त्याने स्पष्ट केलं.
इन्स्टा पोस्ट-
View this post on Instagram
“मी मोठ्या पडद्याचा हिरो आहे आणि प्रेक्षकांनी मला तिथेच पहावं अशी माझी इच्छा आहे. मी मोठ्या पडद्याला साजेसे चित्रपट करणार आहे. एखाद्याने टॅबलेटवर माझा चित्रपट पाहताना मध्येच वॉशरुमला जाण्यासाठी तो बंद केला तर मला ते आक्षेपार्ह वाटेल. तसंच मला 299 किंवा 499 रुपयांमध्ये उपलब्ध व्हायला आवडणार नाही. मला त्यात समस्या आहे,” असं जॉन म्हणाला. जॉनचा एक व्हिलन रिटर्न्स हा चित्रपट येत्या 29 जुलैला प्रदर्शित होणार आहे. मोहित सुरीने या चित्रपटाचं दिग्दर्शन केलं आहे. 2014 मध्ये प्रदर्शित झालेल्या ‘एक व्हिलन’ या चित्रपटाचा हा सीक्वेल आहे.
