आईच्या अंत्यविधीवरून प्रकाश राज ट्रोल; नेटकऱ्याला सुनावलं ‘मी नास्तिक असलो तरी..’

दाक्षिणात्य आणि बॉलिवूड चित्रपटसृष्टीतील प्रसिद्ध अभिनेते प्रकाश राज यांची आई स्वर्णलता यांचं निधन झालं. वयाच्या 86 व्या वर्षी त्यांनी अखेरचा श्वास घेतला. गेल्या काही काळापासून त्या आरोग्याशी संबंधित विविध समस्यांचा सामना करत होत्या. आईच्या निधनाने प्रकाश राज आणि त्यांच्या कुटुंबीयांवर दु:खाचा डोंगर कोसळला आहे. आंध्र प्रदेशचे उपमुख्यमंत्री आणि अभिनेते पवन कल्याण यांच्यासह अनेकांनी सोशल मीडियावर पोस्ट लिहित शोक व्यक्त केला आहे. अशातच आईच्या अंत्यविधीच्या व्हिडीओमुळे एका नेटकऱ्याने प्रकाश राज यांना ट्रोल केलं. जी व्यक्ती स्वत:ला नास्तिक मानते आणि देवावर विश्वास ठेवत नाही, त्या व्यक्तीने ख्रिश्चन पद्धतीनुसार आईच्या पार्थिवावर अंत्यसंस्कार केले, अशा आशयाची पोस्ट एका युजरने एक्स (ट्विटर) अकाऊंटवर लिहिली. त्यावर आता प्रकाश राज यांनी उत्तर दिलं आहे.

संबंधित युजरने प्रकाश राज यांच्या एका मुलाखतीची क्लिप पोस्ट केली आहे. या क्लिपमध्ये ते नास्तिक असल्याचं सांगत आहेत. “माझा देवावर विश्वास नाही. माझ्याकडे वेळ नाही. एका व्यक्तीने जेव्हा मला विचारलं, तेव्हा मी हेच उत्तर दिलं की, माझ्याकडे वेळ नाही. कारण विश्वास ठेवायला देव आहे म्हटल्यावर तो केवळ विश्वासच पुरेसा आहे. नाही म्हणण्यासाठी मला खूप ज्ञानाची गरज लागेल. माझ्याकडे तेवढा वेळ नाही. मी या जगात माणसांसाठी जगतो”, असं स्पष्ट मत ते मांडताना दिसत आहेत. हा क्लिप शेअर करत ट्रोलरने लिहिलं, ‘प्रकाश राज स्वत:ला नास्तिक आणि देवावर विश्वास नसल्याचं म्हणतात. तरी त्यांनी त्यांच्या आईच्या पार्थिवावर ख्रिश्चन पद्धतीनुसार अंत्यसंस्कार केले.’

Yes. I don’t believe in god .. but my mother believed in her god . Who am i to deny her .. the right to be buried according to her belief. This is the basic respect we give one another. Will you Hate mongering monsters understand this #justasking https://t.co/vD1GhySf3M

— Prakash Raj (@prakashraaj) April 2, 2026

प्रकाश राज यांनी ही पोस्ट शेअर करत ट्रोलरला उत्तर दिलं. ‘होय, माझा देवावर विश्वास नाही. पण माझ्या आईचा देवावर विश्वास होता. तिच्या श्रद्धेनुसार दफनविधी करण्याचा तिचा अधिकार नाकारणारा मी कोण आहे? आपण एकमेकांना देत असलेला हा मूलभूत आदर आहे. ही गोष्ट द्वेष पसरवणारे तुम्ही राक्षस कधी समजून घ्याल का’, असा तिखट सवाल त्यांनी संबंधित युजरला केला आहे.

प्रकाश राज यांच्या आई लहानपणी एका अनाथाश्रमात राहिल्या होत्या. तिथे त्यांनी ख्रिस्ती धर्म स्वीकारला होता आणि त्यानंतर त्या परिचारिका बनल्या होत्या. आयुष्यभर संघर्ष करत त्यांनी एकटीनेच कुटुंबाचा सांभाळ केला होता. काहींनी त्यांच्या अंत्यविधीवरून प्रश्न उपस्थित केले असले तरी अनेकांनी प्रकाश राज यांच्या निर्णयाचं कौतुक केलं आहे. स्वत:ची मतं, विश्वास वेगळा असला तरी आईच्या इच्छेचा आदर करणं हीच खरी माणुसकी आहे, असं काहींनी म्हटलं आहे.