Nava Gadi Nava Rajya: ‘नवा गडी नवं राज्य’मध्ये पल्लवी पाटील-अनिता दातेचा आमनासामना; प्रेक्षकांमध्ये मालिकेबद्दल उत्सुकता
पल्लवी पाटील हिच्या करिअरची सुरुवात चित्रपटांपासून झाली. तिने वेगवेगळ्या भूमिका साकारून प्रेक्षकांच्या मनात स्थान मिळवलं आहे. अभिनेत्री पल्लवी पाटील आता 'नवा गडी नवं राज्य' या मालिकेत आनंदी या व्यक्तिरेखेतून पहिल्यांदा प्रेक्षकांच्या भेटीस येणार आहे.
झी मराठी वाहिनीवर ‘नवा गडी नवं राज्य’ (Nava Gadi Nava Rajya) ही मालिका येत्या 8 ऑगस्टपासून प्रेक्षकांच्या भेटीला येणार आहे. या मालिकेचे प्रोमो सध्या सोशल मीडियावर व्हायरल होत असून ‘माझ्या नवऱ्याची बायको’मधील राधिका म्हणजेच अभिनेत्री अनिता दाते (Anita Date) यातून कमबॅक करतेय. अनितासोबतच अभिनेत्री पल्लवी पाटीलचीही (Pallavi Patil) मालिकेत मुख्य भूमिका आहे. पल्लवी पाटील हिच्या करिअरची सुरुवात चित्रपटांपासून झाली. तिने वेगवेगळ्या भूमिका साकारून प्रेक्षकांच्या मनात स्थान मिळवलं आहे. अभिनेत्री पल्लवी पाटील आता ‘नवा गडी नवं राज्य’ या मालिकेत आनंदी या व्यक्तिरेखेतून पहिल्यांदा प्रेक्षकांच्या भेटीस येणार आहे.
मालिकेच्या प्रोमोमध्ये सगळ्यांनी आनंदीला पाहिलं आणि या भूमिकेतून देखील प्रेक्षकांच्या मनात उत्सुकता निर्माण झाली आहे. आनंदीची भूमिका एक नव्या धाटणीची आहे. त्याबद्दल बोलताना पल्लवी म्हणाली, “मी साकारत असलेल्या आनंदीचं पात्र गावातून आलेली स्वच्छंद स्वभावाची मुलगी आहे. तिच्या आजूबाजूच्या लोकांना ती आवडते आणि आनंद पसरवणारी आनंदी आहे. तिच्या नवऱ्याचा अर्धवट राहिलेला संसार ती कशा पद्धतीने पूर्ण करेल आणि हे करत असताना रमा कशी तिला डिवचणार आहे हे मालिकेत पहायला मिळेल. त्या दोघींचा मजेशीर आमना सामना पाहताना प्रेक्षकांचं खूप मनोरंजन होणार आहे. ही प्रेक्षकांसाठी नवी पर्वणी असेल.”
पहा मालिकेचा प्रोमो-
View this post on Instagram
रमा आणि आनंदीच्या जुगलबंदीत आनंदी ही एक आई, एक सून, एक पत्नी अशी नाती निभावून रमाची जागा भरून काढण्याचा प्रयत्न करणार आहे आणि हे बघणं प्रेक्षकांना नक्की आवडेल, असा विश्वास पल्लवीने व्यक्त केला आहे. या मालिकेत अनिता दाते रमाची भूमिका सादर करणार असून, आनंदीच्या भूमिकेत अभिनेत्री पल्लवी पाटील दिसणार आहे. पल्लवी पाटील या मालिकेतून टीव्ही माध्यमात पदार्पण करतेय. तर रमाच्या मुलीच्या भूमिकेत सायशा भोईर दिसणार आहे. अभिनेता कश्यप परुळेकर देखील या मालिकेत मध्यवर्ती भूमिकेत दिसेल.
