मराठी मालिकाविश्वात दबदबा असणाऱ्या मंदार देवस्थळींची नवी मालिका; मांडणार अव्यक्त प्रेमाची गोष्ट
झी मराठी वाहिनीवर प्रेक्षकांच्या भेटीला येणाऱ्या या नव्या मालिकेचं नाव 'तू तेव्हा तशी' (Tu Tevha Tashi) असून यामध्ये स्वप्निल जोशी (Swwapnil Joshi) आणि शिल्पा तुळस्कर यांच्या मुख्य भूमिका आहेत.
मालिका विश्वातील सुप्रसिद्ध दिग्दर्शकाच्या यादीत आघाडीवर असणारे दिग्दर्शक मंदार देवस्थळी (Mandar Devasthali) यांनी अनेक लोकप्रिय मालिका आजपर्यंत प्रेक्षकांसाठी सादर केल्या. ‘वादळवाट’, ‘अवघाचि हा संसार’, ‘होणार सून मी ह्या घरची’, ‘फुलपाखरू’, या त्यांनी दिग्दर्शित केलेल्या मालिका अल्पावधीतच लोकप्रिय झाल्या आणि त्यातील व्यक्तिरेखांनी प्रेक्षकांच्या मनात अढळ स्थान निर्माण केलं. ‘मन उडू उडू झालं’ या त्यांच्या मालिकेनेदेखील प्रेक्षकांची मनं जिंकली आहेत. मंदार देवस्थळी यांच्या मालिकांमधील प्रेमकथांचा आशय हा नेहमी रंजक असतो. आता ते पुन्हा एकदा नवी कलाकृती घेऊन प्रेक्षकांच्या समोर येणार आहेत. पुन्हा एकदा दिग्दर्शकाच्या खुर्चीत बसत झी मराठीवरील (Zee Marathi) आगामी मालिका ‘तू तेव्हा तशी’ (Tu Tevha Tashi) मधून मंदार अव्यक्त प्रेमाची गोष्ट प्रेक्षकांसाठी सादर करणार आहेत.
नुकतंच या मालिकेच्या चित्रीकरणाचा श्रीगणेशा झाला. २० मार्चपासून रात्री ८ वाजता ही मालिका प्रेक्षकांच्या भेटीस येणार आहे. स्वप्नील जोशी आणि शिल्पा तुळसकर यांच्या या मालिकेत मध्यवर्ती भूमिका असून पहिल्यांदाच ही जोडी प्रेक्षकांना छोट्या पडद्यावर पाहायला मिळणार आहे.
View this post on Instagram
या मालिकेबद्दल बोलताना मंदार देवस्थळी म्हणाले, “आम्ही कायमच काहीतरी नवीन करण्याचा प्रयत्न करतो. चालू असलेल्या अनेक प्रेमकथा सांगितल्या, राहून गेलेल्या प्रेमाची गोष्टसुद्धा कदाचित आली असेल, पण आम्ही ही गोष्ट नव्या पद्धतीने सांगतो. हेच तू तेव्हा तशी या मालिकेचं वेगळेपण आहे. या मालिकेचं कथानकदेखील प्रेक्षकांना आवडेल अशी मला खात्री आहे.” या मालिकेत प्रेक्षकांचा अजून एक आवडता चेहरा एका महत्त्वपूर्ण भूमिकेत दिसणार आहे. अभिनेत्री अभिज्ञा भावे ही टेलिव्हिजन विश्वातील लोकप्रिय अभिनेत्री आहे. अनेक वेगवेगळ्या भूमिकांमधून अभिज्ञाने प्रेक्षकांचं मनोरंजन केलं आहे. तू तेव्हा तशी या मालिकेतूनदेखील अभिज्ञा छोट्या पडद्यावर पुन्हा एकदा प्रेक्षकांच्या भेटीस येणार आहे.
