‘आई कुठे काय करते!’ फेम संजनाही कोरोनाच्या विळख्यात, अभिनेत्री रुपाली भोसले होम क्वारंटाईन

मुंबई : स्टार प्रवाह वाहिनीवरील लोकप्रिय मालिका ‘आई कुठे काय करते!’ (Aai Kuthe Kay Karte) फेम संजना अर्थात प्रसिद्ध अभिनेत्री रुपाली भोसले (Rupali Bhosle) हिला कोरोनाची लागण झाली आहे. रुपालीने इन्स्टाग्राम स्टोरी शेअर करत याविषयी माहिती दिली आहे. रुपाली सध्या होम क्वारंटाईन झाली आहे.

“सर्वतोपरी काळजी घेऊनही माझी कोरोना टेस्ट पॉझिटिव्ह आली आहे. मी सर्व नियमांचं पालन करत असून स्वतःला आयसोलेट केलं आहे. सध्या मी होम क्वारंटाईन आहे. मला खात्री आहे, मी लवकरच यातून बरी होईन. प्लीज सगळ्यांनी सुरक्षित राहा आणि मास्क घाला. प्रत्येकाने आपापली आणि इतरांची काळजी घ्या. मास्क लावायला विसरु नका” असं आवाहन रुपालीने इन्स्टाग्राम स्टोरीतून केलं आहे.

अभिनेत्री रुपाली भोसले सध्या होम क्वारंटाईन असल्यामुळे मालिकेत पुढचे काही भाग संजना ही व्यक्तिरेखा न दिसण्याची शक्यता आहे.

कोण आहे रुपाली भोसले

‘आई कुठे काय करते!’ मालिकेत रुपाली भोसले ही संजना दीक्षित ही खलनायिकेची भूमिका साकारत आहे. बिग बॉस मराठीच्या दुसऱ्या पर्वात रुपाली झळकली होती. ‘या गोजिरवाण्या घरात’ मालिकेतून रुपालीने मनोरंजन विश्वात पाऊल ठेवलं. त्यानंतर मन उधाण वाऱ्याचे, दोन किनारे दोघी आपण, दिल्या घरी तू सुखी रहा, स्वप्नांच्या पलिकडले, कुलस्वामिनी, कुलवधू, कन्यादान, वहिनीसाहेब यासारख्या असंख्य मालिकांमध्ये तिने लहान-मोठ्या भूमिका साकारल्या. कस्मे वादे, बडी दूर से आये है, तेनालीराम यासारख्या हिंदी मालिकांमध्येही ती झळकली. अगदी ‘रिस्क’ सिनेमातील छोटेखानी भूमिकेतून तिने बॉलिवूडची दारंही ठोठावली आहेत.

‘बिग बॉस मराठी’मुळे नव्याने ओळख

रुपाली भोसलेला मोठी ओळख मिळाली ती ‘बिग बॉस मराठी’च्या दुसऱ्या सिझनमध्ये. सुरुवातीला शिव-वीणा-किशोरी यांच्या गटात असलेल्या रुपालीची काही वादानंतर ताटातूट झाली. त्यानंतर शेफ पराग कान्हेरेसोबत तिची वाढती जवळीक गॉसिपचा विषय ठरत होती. मात्र अंतिम फेरीपासून काही पावलं दूर असतानाच तिचं अनपेक्षित एलिमिनेशन झालं.

संबंधित बातम्या :

सलग 15 दिवस आमीरच्या मुलीचा उपवास! वजन घटलं की वाढलं? उत्तर इरा खानने दिलंय

कपिल शर्माने पुन्हा एकदा घेतली पंतप्रधान नरेंद्र मोदींची फिरकी, म्हणाला….

भडकलेली नेहा भसीन अभिजीत बिचकुलेला म्हणाली चपलेने मारेल… हे ऐकून बिचकुलेची सटकली आणि मग…