Sharwanand | लग्नाच्या काही दिवस आधीच प्रसिद्ध अभिनेत्याचा कार अपघात; हेल्थ अपडेट आली समोर

हैदराबाद : प्रसिद्ध तेलुगू अभिनेता शारवानंदचा रविवारी कार अपघात झाला. अवघ्या काही दिवसांतच तो लग्नबंधनात अडकणार आहे. लग्नाच्या काही दिवस आधीच त्याचा अपघात झाला असून त्याची प्रकृती आता ठीक आहे. शारवानंदने ट्विट करत याबद्दलची माहिती दिली. मेगास्टार चिरंजीव यांच्यासोबत ‘थम्स अप’ या ब्रँडची जाहिरात केल्यामुळे शारवानंद प्रकाशझोतात आला होता. आपल्या करिअरमध्ये त्याने चिरंजीवी, व्यंकटेश यांसारख्या दिग्गज तेलुगू अभिनेत्यांसोबत काम केलं आहे.

‘आज सकाळी माझ्या कारचा अपघात झाल्याचं वृत्त आहे. पण हा अपघात किरकोळ होता. तुमच्या प्रेमामुळे आणि आशीर्वादामुळे मी सुखरुप आणि सुरक्षित आहे. माझी काळजी करू नका. तुम्हा सर्वांनी व्यक्त केलेल्या काळजीसाठी मी तुमचा आभारी आहे’, असं त्याने ट्विट करत स्पष्ट केलं.

शारवानंदच्या या ट्विटवर कमेंट करत अनेकांनी त्याला काळजी घेण्याचं आवाहन केलं आहे. जूनच्या पहिल्याच आठवड्यात शारवानंदचं लग्न होणार आहे. रक्षिता रेड्डीसोबत तो लग्नगाठ बांधणार आहे. या वर्षी जानेवारी महिन्यात या दोघांचा साखरपुडा पार पडला होता. शारवानंद आणि रक्षिताच्या साखरपुड्याला मेगास्टार चिरंजीवी आणि नागार्जुन यांचं कुटुंब, राणा डग्गुबत्ती, सिद्धार्थ, अदिती राव हैदरी, नितीन, श्रीकांत हे दाक्षिणात्य सेलिब्रिटी उपस्थित होते.

There has been news that my car met with an accident this morning. It was a very minor incident.

I am absolutely safe and sound at Home with all your love and blessings. There is nothing to worry about. Thank you all for your concern.

Have a great Sunday everyone.

— Sharwanand (@ImSharwanand) May 28, 2023

मिळालेल्या माहितीनुसार, रविवारी सकाळी शारवानंदच्या कारचा अपघात झाला. अपघाताच्यावेळी त्याच्यासोबत कारमध्ये इतरही काही जण होते. हैदराबादमध्ये फिल्म नगर जंक्शन या ठिकाणी हा अपघात झाला. कारवरील ताबा सुटल्याने हा अपघात झाला असला तरी सर्व प्रवासी सुखरुप असल्याची माहिती अभिनेत्याच्या टीमने दिली. मात्र या अपघातात कारचं थोडं नुकसान झालं.

शारवानंदने 2004 मध्ये ‘एधो तारिखू’ या तेलुगू चित्रपटातून अभिनयक्षेत्रात पदार्पण केलं. त्याने प्रस्थानम, रन राजा रन, मल्ली मल्ली इदी रानी रोजू, एक्स्प्रेस राजा, महानुभवुडू यांसारख्या चित्रपटांमध्ये भूमिका साकारल्या आहेत. रामचरण आणि राणा डग्गुबत्ती हे त्याचे क्लासमेट्स होते. गेल्या वर्षी त्याचे ‘आडवाल्लू मीकू जोहरालू’ आणि ‘ओके ओका जिवीतम’ हे चित्रपट प्रदर्शित झाले होते.