मालिकेतल्या सहकलाकाराशी अफेअर पडणार महागात; निर्मात्यांकडून करारात ‘हा’ खास नियम समाविष्ट
या मालिकेत मुख्य भूमिका साकारणारे शहजादा धामी आणि प्रतीक्षा होनमुखे हे दोघं एकमेकांना डेट करू लागले होते. या दोघांमधील जवळीक वाढली होती आणि त्याचा परिणाम मालिकेच्या कामावर होऊ लागला होता. सेटवरील त्यांच्या अनप्रोफेशनल वागणुकीमुळे आधी क्रिएटीव्ह टीमशी वाद झाला.
स्टार प्लस वाहिनीवरील ‘ये रिश्ता क्या कहलाता है’ ही मालिका सध्या सोशल मीडियावर जोरदार चर्चेत आहे. नुकतंच या मालिकेतून दोन मुख्य कलाकारांना तडकाफडकी काढून टाकण्यात आलं होतं. शहजादा धामी आणि प्रतीक्षा होनमुखे हो दोघं या मालिकेत रुही आणि अरमानची मुख्य भूमिका साकारायचे. मात्र सेटवरील त्यांचं वागणं, कामाप्रती अप्रामाणिकता आणि एकमेकांसोबत असलेल्या अफेअरमुळे कामाकडे नीट लक्ष न देणं, मेकअप रुममध्ये तासनतास घालवणं यांसारख्या तक्रारींमुळे निर्मात्यांनी त्यांना मालिकेतून बाहेरचा रस्ता दाखवला. सेटवर दोघांचे खूप नखरे असायचे, अशाही तक्रारी काही सहकलाकारांनी केल्या होत्या. म्हणूनच निर्माते राजन शाही यांनी थेट त्यांना मालिकेतून काढण्याचा निर्णय घेतला. आता या मालिकेत नव्या कलाकारांची एण्ट्री झाली आहे. पण पुन्हा त्याच घटना घडू नयेत यासाठी निर्मात्यांनी विशेष काळजी घेतली आहे. त्यांनी नव्या कलाकारांच्या करारात ‘नो अफेअर क्लॉज’ समाविष्ट केला आहे. ज्यामुळे मालिकेत काम करणारे कलाकार एकमेकांना डेट करू शकत नाहीत.
‘ये रिश्ता..’मध्ये शहजादा धामीची जागा घेणारा अभिनेता रोहित पुरोहितने या वृत्ताला दुजोरा दिला आहे. त्याच्याही करारात हा क्लॉज समाविष्ट असल्याचं त्याने म्हटलंय. रोहित म्हणाला, “मीसुद्धा या सर्व चर्चा ऐकल्या आहेत आणि माझ्या करारातही त्याचा उल्लेख आहे. पण हे कितपत यशस्वी ठरेल याचा काही नेम नाही. कारण कोणी जाणूनबुजून प्रेमात पडत नाही. कोणी जाणूनबुजून एखाद्यासोबत अफेअर किंवा रिलेशनशिपमध्ये येत आहे. तुम्ही या गोष्टीवर नियंत्रण आणू शकत नाही. या कायदेशीर बाबी झाल्या, पण वैयक्तिक पातळीवरही तुम्हाला प्रोफेशनल असणं खूप गरजेचं असतं.”
View this post on Instagram
शहजादा आणि प्रतीक्षाच्या अफेअरबद्दल विचारलं असता रोहित म्हणाला की त्याने मीडिया आणि सेटवरील लोकांकडून या चर्चा ऐकल्या आहेत. “मालिकेतून काढून टाकल्याचा टॅग कोणत्याही कलाकारासाठी चांगला नसतो. त्यामुळे सेटवरील नियम मोडता कामा नये. राजन सरांनी जर इतका मोठा निर्णय घेतला आहे तर नक्कीच काहीतरी झालं असेल,” असा अंदाज त्याने व्यक्त केला. राजन शाही यांनी मुख्य भूमिकेसाठी रोहितला साइन करताना म्हटलं होतं की, असं समज जणू मी तुला माझी मुलगी सोपवत आहे. ‘ये रिश्ता क्या कहलाता है’ या मालिकेत शहजादा धामी आणि प्रतीक्षा होनमुखे यांची जागा रोहित पुरोहित आणि गर्विता सधवानी यांनी घेतली आहे.
