फक्त वीकेंडला जिममध्ये करता हेवी वर्कआउट? तुमची ही एक चूक खांद्यांसाठी ठरू शकते धोकादायक

फिट राहण्यासाठी जीममध्ये वर्कआउट करणे ही काही नवीन गोष्ट नाही. पण आठवडाभर ऑफिसमध्ये खुर्चीवर बसून काम केल्यानंतर शनिवार-रविवारी हेवी वर्कआउट करण्याची तुमची सवय खांद्यांसाठी धोकादायक ठरू शकते. दिवसभर लॅपटॉपसमोर बसून राहिल्यानंतर अचानक जड वजन उचलणे किंवा बॅडमिंटन, टेनिससारखे खेळ खेळल्याने खांद्यांवर अतिरिक्त ताण येऊ शकतो. व्यायामामुळे फिटनेस सुधारत असल्याचा आनंद घेत असताना तुम्ही नकळत खांद्यांच्या आरोग्याकडे दुर्लक्ष करत असता. सुरुवातीला होणारी वेदना किंवा हात वर उचलताना जाणवणारा त्रास सामान्य समजून टाळणे तुम्हाला महागात पडू शकते. त्यामुळे ९ ते ५ डेस्क जॉब करणाऱ्यांनी वीकेंडला व्यायाम करताना कोणती काळजी घ्यावी आणि खांद्यांचे नुकसान टाळण्यासाठी काय करावे, हे जाणून घेणे महत्त्वाचे आहे.

आठवडाभर बसून काम केल्यानंतर अचानक हेवी वर्कआउट का आहे हानिकारक?

आठवडाभर डेस्क जॉब केल्यामुळे शरीराची हालचाल मर्यादित होते. अशा परिस्थितीत अचानक एक तास बॅडमिंटन खेळणे किंवा जिममध्ये जड वजन उचलणे हा शरीरासाठी मोठा बदल असतो. बॅडमिंटन आणि टेनिस खेळताना हात वारंवार डोक्याच्या वर उचलावा लागतो. अशा हालचालींमुळे खांद्यांवर अधिक दबाव येऊ शकतो. शरीर या हालचालींसाठी तयार नसताना अचानक जोर लावल्यास खांद्यांच्या समस्या उद्भवण्याची शक्यता वाढते.

जुन्या फिटनेसच्या आधारावर व्यायाम करू नका

पूर्वी नियमित व्यायाम करत असलात तरी दीर्घ विश्रांतीनंतर लगेच पूर्वी इतकाच व्यायाम करणे योग्य नाही. काही वर्षांपूर्वी सहज करता येणारा व्यायाम आजही तितक्याच क्षमतेने करता येईल, असे नाही. विशेषतः थकवा जाणवत असतानाही व्यायाम सुरू ठेवल्यास खांद्यांवरील ताण वाढू शकतो. त्यामुळे शरीराच्या क्षमतेनुसार व्यायाम करणे महत्त्वाचे आहे.

वर्कआउटपूर्वी या गोष्टी करायला विसरू नका

व्यायाम सुरू करण्यापूर्वी थेट जड वजन उचलण्याऐवजी वॉर्मअप करा. बॅडमिंटन किंवा टेनिस खेळण्यापूर्वी केवळ धावण्यावर भर न देता खांदे आणि हातांचाही वॉर्मअप करा. दीर्घ विश्रांतीनंतर व्यायाम पुन्हा सुरू करताना त्याचा कालावधी आणि तीव्रता हळूहळू वाढवा. तसेच, आठवड्याच्या इतर दिवशीही चालणे किंवा हलका व्यायाम करून शरीर सक्रिय ठेवा. आदल्या दिवशी केलेले पुश-अप्स, प्लँक्स किंवा छातीचे हेवी व्यायाम यांना विश्रांती समजू नका. कारण या व्यायामांमुळे खांद्यांवर ताण येतो.

खांद्यांच्या वेदनांकडे दुर्लक्ष करू नका

व्यायामानंतर थोडी जखडण किंवा थकवा जाणवणे सामान्य असू शकते. मात्र, प्रत्येक वेळी हात वर उचलताना, चेंडू फेकताना किंवा बॅडमिंटन खेळताना वेदना होत असतील, खांद्यांमध्ये अशक्तपणा जाणवत असेल किंवा हात फिरवताना त्रास होत असेल, तर त्याकडे दुर्लक्ष करू नका. अशी लक्षणे दिसल्यास व्यायाम थांबवून डॉक्टरांचा सल्ला घ्या. वेळीच काळजी घेतल्यास समस्या वाढण्यापासून रोखण्यास आणि लवकर बरे होण्यास मदत होऊ शकते.