पुतिन पुन्हा आक्रमक, युक्रेनच्या सैनिकांना दोनच शब्दात सुनावलं; म्हणाले, शरण या, तरच…

रशियाचे राष्ट्राध्यक्ष व्लादिमीर पुतिन यांनी कुर्स्क भागात लढणाऱ्या युक्रेनच्या सैनिकांना शरण येण्याचे आवाहन केले आहे. युक्रेनच्या सैनिकांनी शरणागती पत्करली तर ते जिवंत राहतील, असे रशियाच्या राष्ट्राध्यक्षांनी म्हटले आहे. याआधी अमेरिकेचे राष्ट्राध्यक्ष डोनाल्ड ट्रम्प यांनी पुतिन यांना चर्चेदरम्यान युक्रेनच्या सैनिकांचे प्राण वाचवण्याचे आवाहन केले होते.

ट्रम्प आणि पुतिन या दोघांनीही म्हटले आहे की, रशियन सैन्याने कुर्स्कमध्ये युक्रेनच्या सैन्याला घेरले आहे. कीव्हने हे दावे फेटाळून लावले आहेत. मात्र, आपल्या सैन्यावरील दबाव वाढत असल्याची कबुली राष्ट्राध्यक्ष झेलेन्स्की यांनी दिली आहे.

ट्रम्प यांच्या आवाहनानंतर देण्यात आलेले निवेदन

राष्ट्राध्यक्ष ट्रम्प यांच्या आवाहनाची आम्हाला सहानुभूती आहे, असे पुतिन यांनी दूरचित्रवाणीवरून प्रसारित केलेल्या निवेदनात म्हटले आहे. रशियन नेत्याने पुढे म्हटले आहे की, “जर त्यांनी (युक्रेनियन) शस्त्रे टाकली आणि शरणागती पत्करली तर त्यांना जगण्याची आणि सन्मानजनक वागणुकीची हमी दिली जाईल.” पुतिन म्हणाले की, अमेरिकेच्या राष्ट्राध्यक्षांच्या आवाहनाची प्रभावी अंमलबजावणी करण्यासाठी युक्रेनच्या लष्करी राजकीय नेतृत्वाने शस्त्रे टाकली पाहिजेत आणि शरणागतीचे आदेश दिले पाहिजेत.

कुर्स्कमध्ये अमेरिकेची मोहीम तीव्र

रशियाने गेल्या आठवडाभरात कुर्स्कमध्ये आपली मोहीम तीव्र केली असून युक्रेनचा भूभाग आणि पश्चिम सीमेवरील मोठ्या भूभागावर ताबा मिळवला आहे. युक्रेनच्या सैन्याने गेल्या वर्षी ऑगस्टमध्ये अचानक आक्रमण करून कुर्स्कचा मोठा भाग काबीज केला होता. प्रदीर्घ मोहिमेनंतरही रशियन सैन्याला हा संपूर्ण परिसर परत घेता आलेला नाही. मात्र, गेल्या महिन्याच्या अखेरीस व्हाईट हाऊसमध्ये झालेल्या वादानंतर ट्रम्प यांनी अमेरिकेची लष्करी मदत थांबवल्यानंतर युक्रेनचे लष्कर दबावाखाली आले आहे.

रशियाने युक्रेनच्या सैन्याला घेराव घातला

याआधी डोनाल्ड ट्रम्प यांनी शुक्रवारी आपल्या ट्रुथ सोशल प्लॅटफॉर्मवरील पोस्टमध्ये पुतिन यांना आवाहन केले होते की, हजारो युक्रेनचे सैनिक रशियन सैन्याने पूर्णपणे वेढले आहेत आणि ते अत्यंत वाईट आणि असुरक्षित स्थितीत आहेत. पुतिन यांच्याशी फोनवर झालेल्या चर्चेत आपला जीव वाचवण्याची आग्रही विनंती केली होती, असे ट्रम्प यांनी सांगितले.

दरम्यान, युक्रेनने ट्रम्प आणि पुतिन यांचे दावे फेटाळून लावले असून कुर्स्क क्षेत्रावर आपले नियंत्रण असल्याचे म्हटले आहे. जनरल स्टाफने सोशल मीडियावर दिलेल्या निवेदनात म्हटले आहे की, आमच्या तुकड्यांना घेराव घालण्याचा कोणताही धोका नाही. पण आपल्या सैन्यावर रशियाचा दबाव असल्याची कबुली झेलेन्स्की यांनी दिली. जेलेन्स्की यांनी कीव्हमध्ये पत्रकारांशी बोलताना सांगितले की, कुर्स्क भागातील परिस्थिती अत्यंत कठीण आहे.’