याचिका मागे घे नाहीतर ईडी लावेल मागे; आमदारांच्या धमकीने एकच खळबळ
ED | सर्वोच्च न्यायालयातील यचिका मागे घे, नाहीतर ईडी मागे लावेल, अशी धमकी आमदाराने दिल्याचा आरोप करण्यात येत आहे. यामुळे एकच खळबळ उडाली आहे. कोपरगावचे अजित पवार गटाचे आमदार आशुतोष काळे यांनी हे सर्व आरोप फेटाळून लावले आहेत. हा खोटा आरोप असल्याचे त्यांनी म्हटले आहे.
शिर्डी | 9 March 2024 : शिर्डी साईबाबा संस्थानचे माजी अध्यक्ष तसेच कोपरगावचे अजित पवार गटाचे आमदार आशुतोष काळे हे वादात अडकले आहेत. त्यांनी साईबाबा संस्थानच्या विश्वस्तांना सुप्रिम कोर्टातील याचिका मागे घ्यावी यासाठी दबाव आणल्याचा आरोप करण्यात येत आहे.जर याचिका मागे घेतली नाही तर इडी मागे लावू , संपवून टाकू अशी फोनवरून धमकी दिल्याचा आरोप माजी विश्वस्तांनी केला आहे. मात्र केवळ मी सत्ताधारी पक्षाचा आमदार असल्याने आपल्यावर खोटे आरोप करत असल्याचा पलटवार काळे यांनी केला आहे.
काय आहे प्रकरण
2021 साली महाविकास आघाडी सरकारने साईमंदिर विश्वस्त आणि अध्यक्षांची निवड केली होती. मात्र या निवडीस हायकोर्टाने स्थगिती दिल्याने तत्कालिन अध्यक्ष आशुतोष काळे यांच्यासह विश्वस्तांनी सुप्रिम कोर्टात तीन याचिका दाखल करत आव्हान दिले आहे.. या प्रकरणाचा लवकरच निकाल लागण्याची शक्यता असताना आता अजित पवारांसोबत सत्तेत सामील झाल्याने काळे यांनीच याचिका मागे घेण्यासाठी दबाव आणल्याचा आरोप माजी विश्वस्त सुहास आहेर यांनी केला आहे.
तर ईडी मागे लावू
माजी अध्यक्ष आशुतोष काळे यांनी विश्वस्त सुहास आहेर , सचिन गुजर, अविनाश दंडवते यांना फोन केला. याचिका मागे घेण्यासाठी दबाव टाकत धमकी दिल्याचा आरोप विश्वस्तांनी केला आहे. जर याचिका मागे घेतली नाही तर तुमच्या माघे ईडी लावली जाईल,तुमचे राजकीय भवितव्य धोक्यात आणले जाईल , तुमच्या मागे हात धुऊन लागू अशी धमकी दिल्याचे विश्वस्तांचे म्हणणे आहे.
बदनाम करण्याचा प्रयत्न
साईमंदिराचे माजी अध्यक्ष आशुतोष काळे यांनी मात्र हे आरोप फेटाळून लावले आहे. आपण सत्ताधारी पक्षाचा आमदार झाल्याने बदनाम करण्यासाठी आरोप करण्यात येत असल्याचे ते म्हणाले. गेल्या अनेक वर्षांपासून विश्वस्त मंडळ नाही. सरकारला याप्रकरणी मंडळ नेमता यावे यासाठी आपण याचिका मागे घेतल्याचे त्यांनी सांगितले. दरम्यान या आरोपांवरुन एकच खळबळ उडाली आहे. तर याप्रकरणी चौकशीची मागणी करण्यात येत आहे.
