Akola News: गरिबीची क्रुर थट्टा! थेट रुग्णालयात पोहोचला वसुली एजंट; ॲडमिट महिलेकडे कर्जाचा तगादा
उपचारासाठी रुग्णालयात दाखल असलेल्या महिलेजवळ चक्क आयडीएफसी बँकेचा वसुली कर्मचारी कर्जवसुलीसाठी पोहोचला. या प्रकारामुळे संताप व्यक्त केला जात असून शेतकरी संघटनेच्या पदाधिकाऱ्यांनीही संबंधित कर्मचाऱ्याला चांगलेच धारेवर धरले आहे.

गणेश सोनोने, प्रतिनिधी: अकोल्यातून एक धक्कादायक प्रकार समोर आला आहे. कर्जवसुलीच्या नावाखाली आता थेट रुग्णालयातही बँकेचे कर्मचारी पोहोचू लागले आहेत का? असा संतप्त सवाल अकोल्यातील एक घटनेनंतर उपस्थित होत आहे. अकोल्याच्या मूर्तिजापूर तालुक्यात उपचारासाठी रुग्णालयात दाखल असलेल्या महिलेजवळ चक्क आयडीएफसी बँकेचा वसुली कर्मचारी कर्जवसुलीसाठी पोहोचला. या प्रकारामुळे संताप व्यक्त केला जात असून शेतकरी संघटनेच्या पदाधिकाऱ्यांनीही संबंधित कर्मचाऱ्याला चांगलेच धारेवर धरले आहे. या घटनेचा व्हिडिओ आता समोर आला आहे.
संतापजनक! रुग्णालयात पोहोचला वसुली कर्मचारी
समोर आलेल्या माहितीनुसार, अकोला जिल्ह्यातील मूर्तिजापूर तालुक्यातील ही घटना घडली आहे. रुग्णालयात उपचार घेत असलेल्या वैशाली गोपाल इंगळे या महिलेची प्रकृती आणि परिस्थिती लक्षात न घेता आयडीएफसी बँकेचा वसुली कर्मचारी थेट रुग्णालयात पोहोचला.. कर्जाच्या वसुलीसाठी रुग्णालयात आलेल्या या कर्मचाऱ्याच्या कृतीमुळे संतापाची लाट उसळली आहे.
या प्रकाराची माहिती मिळताच शेतकरी संघटनेच्या पदाधिकाऱ्यांनी रुग्णालयात धाव घेत संबंधित वसुली कर्मचाऱ्याला चांगलेच धारेवर धरले असून यावेळी झालेल्या चर्चेचा व्हिडिओही समोर आला आहे. रुग्णालयात उपचार घेत असलेल्या रुग्णाच्या मानसिक आणि शारीरिक परिस्थितीचा विचार न करता अशा पद्धतीने वसुली करणे कितपत योग्य, असा सवाल उपस्थित केला जात आहे.
शेतकरी संघटना, ठाकरे गट आक्रमक!
दरम्यान, सरकारने अशा प्रकारांना आळा घालण्यासाठी तातडीने आदेश काढावेत, अन्यथा कर्जवसुलीसाठी येणाऱ्या एजंटांना शेतकरी संघटना जशास तसे उत्तर देईल, असा आक्रमक पवित्रा घेत शेतकरी संघटनेचे लक्ष्मीकांत कौठकर यांनी सरकारला थेट इशारा दिला आहे. दुसरीकडे या प्रकरणात उद्धव ठाकरे गटाचे उपनेते तथा आमदार नितीन देशमुख यांनीही आक्रमक भूमिका घेतली असून पोलिसांनी तातडीने दखल न घेतल्यास येत्या शनिवारी संबंधित कर्मचाऱ्याच्या घरी जाऊन शिवसेना स्टाईलने जाब विचारणार असल्याचा इशारा दिला आहे.
