मुंबईची कमान महिलेच्या हाती, अश्विनी भिडे पहिल्या महिला आयुक्त; आदेश जारी
मुंबई महापालिकेच्या आयुक्तपदी अश्विनी भीडे यांची नियुक्ती झाली आहे. त्यांच्याकडे मुंबई महापालिका आयुक्तपदाची जबाबदारी सोपवण्यात आली आहे.
मुंबई महानगरपालिकेच्या (BMC) आयुक्तपदी मेट्रो वुमेन म्हणून ओळखल्या जाणाऱ्या अश्विनी भिडे यांची नियुक्ती करण्यात आली आहे. सामान्य प्रशासन विभागाने बुधवारी याबाबत अधिकृत घोषणा केली. सध्याचे मुंबई महापालिका आयुक्त भूषण गगराणी हे ३१ मार्च २०२६ रोजी सेवानिवृत्त होत आहेत. त्यांच्या निवृत्तीनंतर मुंबई महापालिकेच्या आयुक्तपदी कोणाची नियुक्ती होणार याची चर्चा गेल्या अनेक दिवसांपासून सुरू होती.
भेटीगाठींचा परिणाम?
मुंबई महापालिका आयुक्तपदासाठी संजय मुखर्जी, असीम गुप्ता, मिलिंद म्हैसकर, विकास खारगे, मनीषा वर्मा, व्ही राधा या अधिकाऱ्यांची नावे चर्चेत होती. हे अधिकारी अश्विनी भिडे यांच्यापेक्षा वरिष्ठही आहेत. मात्र, वरिष्ठता डावलून अश्विनी भिडे यांच्याकडे महापालिका आयुक्तपद देण्यात आलं आहे, अशी चर्चा सुरू झाली आहे. अश्विनी भिडे या 1995 च्या तुकडीतील अधिकारी आहेत. यामुळे 1990 ते 1994 मधील जवळपास 10-12 अधिकारी डावलले गेले असल्याचं बोललं जात आहे. कालच अश्विनी भिडे यांनी राज्याचे उपमुख्यमंत्री तसेच नगरविकास मंत्री एकनाथ शिंदे यांची भेट घेतली होती. त्यानंतर आज भिडे यांच्याकडे मुंबईचं महापालिका आयुक्तपद देण्यात आलं आहे.
अश्विनी भिडे या १९९५ बॅचच्या आयएएस अधिकारी आहेत. मुंबई मेट्रो रेल कॉर्पोरेशन (MMRCL) च्या व्यवस्थापकीय संचालक म्हणून मेट्रो लाइन ३ च्या प्रकल्पात त्यांनी महत्त्वपूर्ण भूमिका बजावली होती. तसेच मुंबई महापालिकेच्या अतिरिक्त आयुक्तपदावरही त्यांनी उल्लेखनीय कामगिरी केली आहे. आता मुंबई महापालिकेची सर्वोच्च जबाबदारी त्यांच्या हाती आली आहे. अश्विनी भिडे मुंबई महापालिकेच्या पहिल्या महिला आयुक्त ठरल्या आहेत.
अश्विनी भिडे कोण आहेत?
-१९९५ बॅचच्या IAS अधिकारी
-मुंबई मेट्रो प्रकल्पात ‘मेट्रो वुमेन’ म्हणून प्रसिद्ध
-मुंबई महापालिकेच्या अतिरिक्त आयुक्त म्हणून काम केलेले
-मुख्यमंत्री देवेंद्र फडणवीस यांच्या निकटवर्तीय अधिकारी म्हणून ओळख
मुख्यमंत्री देवेंद्र फडणवीस यांच्या विश्वासातील अधिकारी म्हणून अश्विनी भिडे यांची विशेष ओळख आहे. मेट्रो प्रकल्पातील त्यांच्या कामगिरीमुळे त्यांना ‘मेट्रो वुमेन’ असे संबोधले जाते.
पूर्वीच्या आयुक्तांची यादी
इक्बाल चहल यांच्या बदलीनंतर भूषण गगराणी यांची मुंबई महापालिकेच्या आयुक्तपदी नियुक्ती झाली होती. भूषण गगराणी यांच्यानंतर आता अश्विनी भिडे यांच्याकडे मुंबई महानगरपालिकेची धुरा सोपवण्यात आली आहे.
