Assembly Elections 2024: जागा वाटपानंतरही भाजप आपल्या उमेदवारांना मित्रपक्षांकडून लढवणार? भाजपच्या खेळीने…
जागा वाटपानंतर भाजप आपले काही उमेदवार मित्र पक्षांच्या चिन्हावर लढवणार असल्याची चर्चा आहे. लोकसभेत भाजपने हाच फॉर्मूला वापरला होता. आता विधानसभेतही हेच सूत्र वापरणार असल्यामुळे मित्रपक्षांनी जागा जास्त दिसणार असल्या तरी काही ठिकाणी भाजप उमेदवार लढणार आहे.
विधानसभा निवडणूक जाहीर होताच राजकीय वातावरण तापू लागले आहे. महाविकास आघाडी आणि महायुतीमध्ये जागा वाटपावर चर्चा सुरु आहे. त्यापूर्वी महायुतीमधील भाजपने ९९ उमेदवारांची यादी जाहीर केली आहे. महायुतीमधील १५५ ते १६० जागा भाजप लढवणार असल्याची चर्चा आहे. शिंदे यांची शिवसेना ७५ ते ८० आणि अजित पवार यांची राष्ट्रवादी ५० ते ५५ जागांवर उमेदवार उभे करणार असल्याचे म्हटले जात आहे. परंतु या जागा वाटपानंतर भाजप आपले काही उमेदवार मित्र पक्षांच्या चिन्हावर लढवणार असल्याची चर्चा आहे. लोकसभेत भाजपने हाच फॉर्मूला वापरला होता. आता विधानसभेतही हेच सूत्र वापरणार असल्यामुळे मित्रपक्षांनी जागा जास्त दिसणार असल्या तरी काही ठिकाणी भाजप उमेदवार लढणार आहे.
राजहंस सिंग, निलेश राणे शिंदे सेनेतर्फे लढणार
भाजपचे विधान परिषदेचे सदस्य राजहंस सिंग यांचे डिंडोशीवर लक्ष केंद्रीत केले आहे. ते मुख्यमंत्री एकनाथ शिंदे यांच्या नेतृत्वाखालील शिवसेनेतर्फे निवडणूक लढवणार आहेत. सूत्रांच्या माहितीनुसार, सिंग हे डिंडोशी मतदारसंघातून निवडणूक लढवण्याची शक्यता आहे. जिथे त्यांनी २००९ मध्ये विधानसभा निवडणूक जिंकली होती. तसेच निलेश राणे शिंदे सेनेकडून निवडणूक मैदानात उतरणार असल्याचे म्हटले जात आहे.
भाजपने नितेश राणे यांना कणकवली देवगड वैभववाडी विधानसभा मतदारसंघातून उमेदवारी दिली आहे. नारायण राणे खासदार आहेत. आता नारायण राणे यांचा दुसरा मुलगा निलेश राणे यांनाही तिकीट हवे आहे. परंतु ते भाजपऐवजी शिंदेसेनेकडून मैदानात उतरणार आहे. निलेश राणे 23 ऑक्टोबरला मुख्यमंत्री एकनाथ शिंदे यांच्या शिवसेनेत प्रवेश करण्याची शक्यता आहे. निलेश राणे कुडाळमधून निवडणूक लढवण्यासाठी इच्छूक आहेत.
सांगली जिल्ह्यातील इस्लामपूर आणि तासगाव-कवठेमहांकाळ या दोन मतदारसंघांमध्ये भाजपचे कार्यकर्ते अजित पवार यांच्या राष्ट्रवादी काँग्रेसचे उमेदवार होणार आहे. यामुळे या दोन्ही दोन्ही गट एकमेकांसमोर उभे ठाकणार आहे.
आदित्य ठाकरे यांचे निकटवर्ती शिंदे सेनेचे उमेदवार
दरम्यान, शिंदे सेनेकडून आदित्य ठाकरे यांचे माजी निकटवर्ती राहुल कनाल यांनाही उमेदवारी दिली जाणार आहे. ते श्रीकांत शिंदे यांच्या जवळचे मानले जातात. त्यांचा कालिना मतदारसंघातून उद्धव बाळासाहेब ठाकरे पक्षाचे उमेदवार संजय पोटणीस यांच्याशी थेट सामना होण्याची शक्यता वर्तवली जात आहे.
