मनोज जरांगेंना पाठिंबा देण्यासाठी डुप्लिकेट नितेश राणे थेट अंतवाली सराटीत, नेमकं प्रकरण काय?

मराठा आरक्षणासाठी मनोज जरांगे पाटील यांनी पुन्हा एकदा आक्रमक भूमिका घेतल्याचं पहायला मिळत आहे. त्यांनी पुन्हा एकदा आंतरवाली सराटीमध्ये उपोषणाला सुरुवात केली आहे. आज त्यांच्या उपोषणाचा दुसरा दिवस आहे. दरम्यान मनोज जरांगे पाटील यांच्या आंदोलनाला मोठा पाठिंबा मिळत असतल्याचं पहायला मिळत आहे. राज्यभरातून मराठा बांधव आंतरवाली सराटीमध्ये आले आहेत. मात्र सध्या चर्चा सुरू आहे, ती म्हणजे डुप्लिकेट नितेश राणेंची हो तुम्ही बरोबर ऐकलं आहे.  मनोज जरांगे पाटील यांच्या आंदोलनाला पाठिंबा देण्यासाठी डुप्लिकेट नितेश राणे अंतरवाली सराटीमध्ये आले आहेत. हुबेहूब नितेश राणे यांच्या सारखे दिसणारे मराठा बांधव दिनेश पवार हे देहूवरून थेट अंतरवालीमध्ये दाखल झाले  आहेत.

दिनेश पवार हे मराठा बांधव हुबेहुब नितेश राणे यांच्यासारखेच दिसत असल्याने त्यांच्यासोबत सेल्फी काढण्यासाठी आंदोलकांनी मोठी गर्दी केली आहे. नितेश राणे यांना भेटलो तर त्यांना नक्कीच मराठा समाज बांधवांच्या मागण्या संदर्भात बोलू असं यावेळी दिनेश पवार यांनी म्हटलं आहे.  अनेकजण तर त्यांना राणे साहेब नावाने हाक मारत असल्याचं देखील पहायला मिळत आहे.

मनोज जरांगे पाटलांकडून मुंबईत येण्याचा इशारा  

मराठा आरक्षण आंदोलक मनोज जरांगे पाटील यांनी पुन्हा एकदा उपोषणाला सुरुवात केली आहे, आज त्यांच्या उपोषणाचा दुसरा दिवस आहे. दरम्यान मनोज जरांगे पाटील यांनी पुन्हा एकदा मुंबईत येण्याचा इशारा दिला आहे. त्यांनी सरकारला 15 दिवसांची डेडलाईन दिली आहे. जर येत्या 15 दिवसांमध्ये मागण्या मान्य न झाल्यास बारा संप्टेबर रोजी महाराष्ट्रातील मराठा बांधवांची बैठक घेऊ आणि मुंबईला जाण्याची घोषणा करू, मी पुन्हा मुंबईमधून माघारी येणार नाही, असा इशाराही त्यांनी दिला आहे. त्यामुळे आता या आंदोलनावर सरकार कसा तोडगा काढणार? हे पहाणं महत्त्वाचं ठरणार आहे. तसेच आज परभणीमध्ये शिवसेनेचा शेतकरी मेळावा होत आहे, या मेळाव्यावरून देखील मनोज जरांगे पाटील यांनी नाराजी व्यक्त केली.

.