स्वारगेट बलात्कार प्रकरणातील पीडितेनं घेतली एकनाथ शिंदेंची भेट, म्हणाली आरोपीला…

काही दिवसांपूर्वी पुण्यामधून एक धक्कादायक घटना समोर आली होती. पुण्यातील स्वारगेट बसस्थानकात उभ्या असलेल्या एका बसमध्ये तरुणीवर अत्याचार करण्यात आला. या घटनेनं राज्यभरात खळबळ उडाली होती. दत्तात्रय गाडे असं या प्रकरणातील आरोपीचं नाव आहे. पोलिसांनी आरोपीला त्याच्याच गावातून अटक केली होती. दरम्यान या घटनेनंतर आरोपीच्या नातेवाईकांकडून वेगवेगळे दावे देखील करण्यात आले. आता या प्रकरणातील पीडित तरुणीनं उपमुख्यमंत्री एकनाथ शिंदे आणि विधान परिषदेच्या उपसभापती नीलम गोऱ्हे यांची भेट घेतली आहे.

पुणे बलात्कार प्रकरणातील पीडितेनं विधान भवनात आज उपमुख्यमंत्री एकनाथ शिंदे आणि विधान परिषदेच्या उपसभापती नीलम गोऱ्हे यांची भेट घेतली. यावेळी एकनाथ शिंदे आणि नीलम गोऱ्हे यांनी पीडितेच्या तब्येतीची विचारपूस केली. यावेळी पीडित महिलेनं आपली व्यथा त्यांना सांगितली. आरोपीला लवकरात लवकर कठोर शिक्षा करण्याची मागणी देखील यावेळी पीडित महिलेनं एकनाथ शिंदे यांच्याकडे केली आहे.

दरम्यान पीडित महिलेची व्यथा ऐकल्यानंतर उपमुख्यमंत्री एकनाथ शिंदे यांनी तीला न्यायासाठी वचनबद्ध असल्याची ग्वाही दिली. राज्य सरकार महिलांच्या सुरक्षेसाठी आणि न्यायासाठी सर्वतोपरी मदत करत असल्याचंही यावेळी उपमुख्यमंत्री एकनाथ शिंदे यांनी पीडितेला सांगितलं. या भेटीनंतर पीडीत महिलेला लवकरात लवकर न्याय मिळावा यासाठी यासंदर्भात नीलम गोऱ्हे यांनी मुख्यमंत्री देवेंद्र फडणवीस यांच्याशी देखील चर्चा केली.

नेमकं काय आहे प्रकरण?   

पुण्यामध्ये ही धक्कादायक घटना घडली होती, पुण्यातील स्वारगेट स्थानकात उभ्या असलेल्या एका बसमध्ये तरुणीवर बलात्कार करण्यात आला. या तरुणीवर एकदा नाही तर दोनदा बलात्कार झाल्याचं वैद्यकीय अहवालामधून समोर आलं. या घटनेनंतर राज्यातील वातावरण चांगलंच तापलं होतं. महिलांच्या सुरक्षेचा मुद्दा पुन्हा एकदा ऐरणीवर आला. या प्रकरणातील आरोपीला पोलिसांनी त्यानंतर त्याच्याच गावातून अटक केलं. दत्तात्रय गाडे असं या प्रकरणातील आरोपीचं नाव आहे. सध्या आरोपी कोठडीत असून, घटनेसंदर्भात तपास सुरू आहे. आज या घटनेतील पीडितनेनं उपमुख्यमंत्री एकनाथ शिंदे यांची भेट घेतली.