MPSC Student Agitation: दोन आंदोलकांची तब्येत खालावली… मध्यरात्री उपोषणस्थळी काय घडलं? आज MPSC विद्यार्थ्यांच्या आंदोलनावर तोडगा निघणार?

MPSC Student Protest : महाराष्ट्र लोकसेवा आयोगाच्या अध्यक्ष विवेक भीमनवार यांच्या राजीनाम्याच्या मागणीसाठी पुण्यात विद्यार्थी आक्रमक झाले आहेत. पुण्यातील एस. एम. जोशी पुलावरती गेली सात दिवसांपासून MPSC विद्यार्थ्यांचे आंदोलन सुरू आहे. शरदचंद्र पवार राष्ट्रवादीचे आमदार रोहित पवार हे या आंदोलनात उतरलेले आहेत. आज या आंदोलनाचा आठवा दिवस आहे. या आंदोलनाला देशभरातील विविध पक्षाचे नेते भेट देत आहेत. राज्यातील विविध पक्षाच्या आमदारांनी आणि विविध क्षेत्रातील मान्यवरांनी या आंदोलनातील विद्यार्थ्यांना पाठिंबा दिला आहे. इतकेच नाही तर सत्ताधारी खासदारांनीही आंदोलनाला भेट दिली आहे. हे आंदोलन हायजॅक झाल्याचा दावा मुख्यमंत्री देवेंद्र फडणवीस यांनी केला आहे. तर भीमनवार यांच्या राजीनाम्यावरून आंदोलक ठाम आहेत. हायकोर्टानेही या आंदोलनावरून कान टोचले आहेत. रस्ता आडवू नका असे हायकोर्टाने फटकारले आहे. तर काल रात्री उपोषणकर्त्या दोन विद्यार्थ्यांची तब्येत खालावली आहे.

दोन विद्यार्थ्यांची प्रकृती खालावली

एमपीएससी विद्यार्थ्यांचे आणि आमदार रोहित पवार यांचे आंदोलन सुरू आहे. आज आंदोलनाचा आठवा दिवस आहे. राज्य सरकार मधील मंत्री आज दुपारी विद्यार्थ्यांशी चर्चा करण्यासाठी आंदोलन स्थळी येणार असल्याची माहिती समोर आली आहे. मध्यरात्री उपोषणाला बसलेल्या दोन आंदोलकांची तब्येत खालावल्याने त्यांना रुग्णालयात दाखल करण्यात आले. ऋषिकेश गांगुर्डे आणि गजानन शेळके अशी या विद्यार्थ्यांची नावे आहेत. विद्यार्थ्यांच्या आंदोलनावर आज तोडगा निघतो का? याकडे सर्वांचे लक्ष लागले आहे.

दिपाली सय्यद यांच्या वक्तव्यावरून नाराजी

मी आज तुमच्या सगळ्यांच्या समर्थनार्थ आले आहे. कोल्हापूरच्या सुपुत्र याचा आवाज घराघरांत गाजतोय. हा लढा विद्यार्थ्यांचा आहे. कोल्हापूरच्या रांगड्या मातीतील विवेकानंद बोलीतुन धोबी पछाड करतोय. तुम्ही महाराष्ट्रातील भविष्य आहात संघर्षाशिवाय काहीच मिळत नाही. तुमचा संघर्ष वाया जाणार नाही. २०१७ मध्ये मी पाण्यासाठी उपोषण केले होते. ४ दिवसांचे अहिल्यानगर मध्ये उपोषण केले होते, असे अभिनेत्री दिपाली सय्यद म्हणाल्या. माझा चित्रपट एफस्टिन फाईल येतोय. त्यासाठी संघर्ष करावा लागला. हे सर्व सामान्यांचे सरकार आहे असं म्हटल्यावर दिपाली सय्यद यांना विद्यार्थ्यांनी प्रचंड विरोध केला.

आंदोलकांवर कुणाची मालकी नाही

रोहित पवार बसलेल्या ठिकाणी आंदोलनाला मी भेट देणार म्हणजे देणार आहे, असे गुणरत्न सदावर्ते म्हणाले. मी विद्यार्थ्यांमध्ये भेदभाव करत नाही. विद्यार्थ्यांसाठी कालही झगडणारा वकील म्हणून त्यांना मी माहिती आहे. रोहित पवार यांचं राजकारणासाठी विद्यार्थ्यांना वापरणारे अफेअर आहे. रोहित पवार बसलेल्या ठिकाणी विद्यार्थ्यांच्या आंदोलनाला मी भेट देणार ते विद्यार्थी माझे आहेत त्यांच्यावर कुणाची मालकी नाही. एकाही विद्यार्थ्यांनी मला शिवागाळ केली नाही. विद्यार्थी मला म्हणतायेत आमच्या बाजूने बोला, असे सदावर्ते म्हणाले.