महायुतीत मिठाचा खडा, ‘शरीर शिंदेंसोबत, आत्मा ठाकरेंसोबत’, भाजप नेत्याचा कीर्तिकरांवर निशाणा

मुख्यमंत्री एकनाथ शिंदे यांच्या शिवसेनेचे खासदार गजानन कीर्तिकर यांनी ईडीच्या मुद्द्यावरुन केलेल्या वक्तव्यामुळे आता महायुतीत मिठाचा खडा पडल्याचं चित्र निर्माण झालं आहे. गजानन कीर्तिकर यांचे चिरंजीव अमोल कीर्तिकर यांच्यामागे कथित कोविड खिचडी घोटाळ्याप्रकरणी ईडी चौकशीचा ससेमिरा लागला आहे. पण यावरुन गजानन कीर्तिकर यांनी भाजपवर टीका केली आहे. “ईडीबद्दल माझं स्पष्ट मत आहे की आता ईडीचा प्रयोग करता कामा नये. आता ईडीचा वापर थांबवा, त्याला लोकं कंटाळली आहेत, चीड निर्माण झाली आहे”, असं स्पष्ट वक्तव्य गजानन कीर्तिकर यांनी केलं आहे. त्यामुळे आता महायुतीत मिठाचा खडा पडल्याचं चित्र आहे. कारण कीर्तिकर यांच्यावर भाजप आमदार अमीत साटम यांनी निशाणा साधला आहे. “कीर्तिकरांचं शरीर शिंदेंसोबत आणि आत्मा ठाकरे गटाचे प्रमुख उद्धव ठाकरेंसोबत आहे”, अशी टीका अमीत साटम यांनी केली आहे.

“असे वाटते की, गजानन कीर्तिकर यांचे शरीर मुख्यमंत्री एकनाथ शिंदे यांच्याबरोबर आहे आणि आत्मा माजी मुख्यमंत्री उद्धवजी ठाकरे यांच्यासोबत आहे. एकदा त्यांनी ठरवावे की ते कुणाबरोबर आहेत. मोदींचा चेहरा वापरून भाजप कार्यकर्त्यांच्या जीवावर दोनदा खासदार झाले. ईडी पासून घाबरण्याची गरज भ्रष्टाचाऱ्यांना आहे. जर कर नाही तर डर कशाला? ठाकरे गटाचे उमेदवार अमोल कीर्तिकर यांच्या अकाउंटमध्ये खिचडीच्या कंत्राटदाराकडून 95 लाख रुपये आलेच का? याचे उत्तर द्यावे! भ्रष्टाचारियो की खैर नही! कार्यवाही तो होगी ही”, अशी टीका अमीत साटम यांनी केली आहे.

गजानन कीर्तिकर नेमकं काय म्हणाले?

“अमोल आणि सूरजवर खिचडी घोटाळ्या संदर्भातील आरोपांचा राग येतो. कोरोना आला तेव्हा सर्व काही तात्काळ हवं होतं. तेव्हा पटापट गरज होती, तेव्हा पुष्कळसे व्हेंडर आले. त्यापैकी एक संजय माशेलकर आहेत. ते आमच्या शिवसेनेत आहेत, त्यांनी कंपनी स्थापन केली. त्यामध्ये अमोल किंवा सूरज भागीदार नाहीत, पण सप्लाय चेनमध्ये त्यांनी जीवावर उदार होऊन काम केलं. त्या कंपनीला प्रॉफिट झालं, त्यानंतर अमोल आणि सूरजला चेकने मानधन मिळालं. ते पैसे बँकेत टाकले, त्यावर इन्कम टॅक्सही लागला. यामध्ये मनी लाँड्रिंग नाही”, असं स्पष्ट वक्तव्य गजानन कीर्तिकर यांनी केलं.

“मी आता उत्तर पश्चिमचा खासदार आहे निवडणूक लढत नाही हे जाहीर केलं आहे. उबाठा गटाचा उमेदवार अमोल कीर्तिकर आहे सर्वांना माहिती आहे. आमचा महायुतीचा उमेदवार जाहीर होईल तेव्हा पूर्ण ताकद लावणार आहे. महायुतीच्या उमेदवाराला विजयी करण्यासाठीच काम करणार”, अशी देखील प्रतिक्रिया गजानन कीर्तिकर यांनी केली. एकीकडे कीर्तिकर आपल्या मुलाविरोधातील कारवाईला विरोध करत आहेत. पण निवडणुकीत आपल्या मुलाच्या पराभवासाठीदेखील ते काम करणार असल्याचं म्हणत आहेत.