12 आमदारांचं निलंबन करून महाविकास आघाडीने लोकशाहीचा गळा घोटला; प्रवीण दरेकरांचा हल्लाबोल

मुंबई : पावसाळी अधिवेशनाच्या पहिल्याच दिवशी विधानसभा अध्यक्षांच्या दालनात जोरदार राडा पाहायला मिळाला. सत्ताधारी आणि भाजप आमदारांमध्ये धक्काबुक्की झाली. इतकंच नाही तर तालिका अध्यक्ष भास्कर जाधव यांनाही धक्काबुक्की आणि शिविगाळ करण्यात आल्याचा आरोप करण्यात आला. या घटनेनंतर भास्कर जाधव यांनी आपलं मत सभागृहात मांडलं. त्यानंतर संसदीय कामकाज मंत्री अनिल परब यांनी भाजप आमदारांच्या निलंबनाचा ठराव मांडला आणि हा ठराव आवाजी बहुमतानं मंजूरही करण्यात आला आहे. भाजपच्या 12 आमदारांचं एक वर्षासाठी निलंबन करण्यात आलं आहे. दरम्यान, या निलंबनानंतर विधान परिषदेचे विरोधी पक्षनेते प्रवीण दरेकर यांनी महाविकास आघाडी सरकारवर जोरदार हल्लाबोल केला आहे. (BJPs 12 MLA Suspended, its murder of Democracy says Pravin Darekar)

ओबीसी आरक्षणावरील ठरावावर चर्चा सुरू असताना राजदंड उचलणे, माईक ओढणे आणि सभागृह अध्यक्षांना शिवीगाळ केल्याप्रकरणी आज एकूण 12 सदस्यांचं निलंबन करण्यात आलं आहे. आशिष शेलार, योगेश सागर, अभिमन्यू पवार, संजय कुटे, अतुल भातखळकर, पराग अळवणी, गिरीश महाजन, राम सातपुते, हरीश पिंपळे, नारायण कुचे, जयकुमार रावत किर्तीकुमार बागडीया आदी आमदारांना एक वर्षासाठी निलंबित करण्यात आलं आहे. या वर्षभरात त्यांना मुंबई आणि नागपूर येथील अधिवेशनात सामिल होण्यास मज्जाव करण्यात आला आहे. संसदीय कामकाज मंत्री अनिल परब यांनी ही माहिती आज विधानसभेत दिली.

महाविकास आघाडीने लोकशाहीचा गळा घोटला

दरम्यान, प्रवीण दरेकर म्हणाले की, आघाडीच्या नेत्यांनी केलेला दावा चुकीचा आहे, ज्या पद्धतीने विरोधक आक्रमक होऊन सरकारचे कपडे काढत आहे, किंबहुना सरकार दीड वर्षात अपयशी झाल्याचे मुद्दे विधीमंडळात मांडत आहे. या सरकारला कोणत्याही विषयावर चर्चा नको. मराठा आरक्षणावर चर्चा नको, ओबीसी राजकीय आरक्षणावर चर्चा नको. आज एमपीएससीचे प्रश्न प्रलंबित आहेत. MPSC परीक्षा उत्तीर्ण होऊनही नोकरी न मिळाल्यामुळे पुणे येथे स्वप्नील लोणकर या तरुणाने आत्महत्या केली. आज विद्यार्थ्यांमध्ये असंतोष आहे. या सर्व असंतोषाला वाचा फोडण्याचे काम भारतीय जनता पार्टी विरोधी पक्ष म्हणून करत आहे. सरकारची अस्थिरता आणि दुसऱ्या बाजूला असणारे जनतेचे प्रश्न या सगळ्यांचा सरासर कट करून नियोजन पद्धतीने लोकशाहीचा गळा घोटण्याचं काम महाविकास आघाडी सरकारने केलं आहे.

सभागृहात नेमकं काय घडलं?

राज्याचे अन्न व नागरी पुरवठा मंत्री छगन भुजबळ यांनी आज विधानसभेत ओबीसींचा इम्पिरीकल डेटा केंद्र सरकारकडून मिळावा म्हणून अधिवेशनात ठराव मांडला. त्यावर विरोधी पक्षनेते देवेंद्र फडणवीस यांनी भाजपची भूमिका मांडली. त्यानंतर भुजबळांनी बोलण्यास सुरुवात केली. यावेळी उज्ज्वला गॅससाठी डेटा वापरला जातो. मग ओबीसींच्या आरक्षणासाठी का दिला जात नाही? असा सवाल भुजबळ यांनी केला. त्यावर फडणवीसांनी हरकतीचा मुद्दा मांडला. त्यावेळी तालिका अध्यक्षांनी फडणवीसांचा हरकतीचा मुद्दा स्वीकारला नाही. अध्यक्षांनी भुजबळांना बोलण्यास सांगितलं. त्यामुळे भाजपचे आमदार आक्रमक झाले.

भाजपच्या आक्रमक आमदारांनी अध्यक्षांच्या समोरी हौदात येऊन जोरदार घोषणाबाजी करत गोंधळ घातला. त्यानंतर एका आमदाराने अध्यक्षांचा माईक ओढला. या गदारोळात धक्काबुक्की झाली. यावेळी भाजपच्या आमदारांनी तालिका अध्यक्षांना शिवीगाळही केल्याचा आरोप करण्यात येत आहे. त्यामुळे सभागृहाचं वातावरण अधिकच तापलं होतं.

संबंधित बातम्या

तालिका अध्यक्ष म्हणून भास्कर जाधव यांचं नाव डांबराने लिहिलं जाईल, अतुल भातखळकरांचा घणाघात

तालिबानी ठाकरे सरकारचं अभिनंदन, नो बॉलवर विकेट काढणाऱ्यांना सभागृहाबाहेर पळता भुई थोडी करेल : आशिष शेलार

भाजपा आमदारांकडून सभागृहातच धमक्या, काँग्रेस प्रदेशाध्यक्ष नाना पटोलेंचा गंभीर आरोप

(BJPs 12 MLA Suspended, its murder of Democracy says Pravin Darekar)