अमित ठाकरेंनी हात उचलल्याचा आरोप, मनसेच्या दोन गटांमध्ये तणाव, नवी मुंबईत काय घडतंय?

रवी खरात, नवी मुंबई, Tv9 मराठी | 9 जानेवारी 2024 : महाराष्ट्र नवनिर्माण सेना पक्षात अतिशय टोकाचा कलह बघायला मिळतोय. मनसेचे मराठी कामगार सेनेचे अध्यक्ष महेश जाधव यांनी मनसे नेते अमित ठाकरे यांच्यावर गंभीर आरोप केला. आपण कामगारांची बाजू घेतली म्हणून अमित ठाकरेंनी आपल्यावर हात उचलला, असा दावा महेश जाधव यांनी केला होता. त्यांच्या या आरोपांनंतर नवी मुंबईत वातावरण तापलं होतं. महेश जाधव यांच्या समर्थकांनी मनसे कार्यकर्त्यांमा पळवून-पळवून मारहाण केल्याची माहिती समोर आली होती. त्यानंतर आता मनसे कार्यकर्ते आक्रमक झाले आहेत. मनसे कार्यकर्ते हातात रॉड घेऊन नवी मुंबईच्या रस्त्यावर दाखल झाले. दोन्ही बाजूचे कार्यकर्ते आक्रमक झाल्याने परिसरात तणावाचे वातावरण निर्माण झालंय. या घडामोडी पाहता परिसरात पोलिसांचा मोठा फौजफाटा दाखल झालाय.

“माथाडी कामगारांनी महाराष्ट्र सैनिकांना मारलं आहे ही बाईट आधी थांबवा. जर परत महाराष्ट्रात कोणत्याही महाराष्ट्र सैनिकाला एकट्याला धरला तर घरात घुसून पळवू. ते आज भेटले नाहीत तरी उद्या-परवा भेटतील”, असं मनसे कार्यकर्ते कॅमेऱ्यासमोर म्हणाले. यावेळी पोलिसांनी कार्यकर्त्यांना शांत राहण्याचं आवाहन केलं. वाद होऊ नये, यासाठी पोलिसांचा फौजफाटा घटनास्थळी दाखल झाले आहेत.

योगेश चिले यांचा महेश जाधवांवर गंभीर आरोप

मनसेकडून महेश जाधव यांची मनसे मराठी कामगार सेनेच्या अध्यक्ष पदावरुन हकालपट्टी करण्यात आली आहे. मनसेकडून आपल्या अधिकृत ट्विटर अकाउंटवर याबाबत माहिती देण्यात आली आहे. तसेच मनसे नेते योगेश चिले यांनी या प्रकरणावर प्रतिक्रिया दिली आहे. महेश जाधव अनेक बिल्डरांकडून खंडणी मागत होते, असा आरोप योगेश चिले यांनी केलाय. तसेच अमित ठाकरेंनी महेश जाधव यांना कामगारांपासून वाचवलं असंही योगेश चिले म्हणाले. महेश जाधव यांना वाचवून सुद्धा ते अमित ठाकरे आणि राज ठाकरे यांच्याबाबत बोलत आहेत. पण राज ठाकरे आणि अमित ठाकरे यांच्याविरोधात बोलाल तर परिणाम भोगावे लागतील, असा इशारा योगेश चिले यांनी दिलाय.