ठाकरे बंधूंचा मोर्चा… देवेंद्र फडणवीस यांचं एका वाक्यात उत्तर, म्हणाले, त्यांना…

देशाचे मुख्य निवडणूक आयुक्त ज्ञानेश कुमार यांच्या कथित निवडणूक घोटाळ्याच्या विरोधात येत्या 4 ऑक्टोबर रोजी ठाकरे बंधूंनी आंदोलन करण्याचा निर्णय घेतला आहे. मुंबईत हे आंदोलन होणार असून स्वत: माजी मुख्यमंत्री उद्धव ठाकरे आणि मनसे प्रमुख राज ठाकरे या आंदोलनाचं नेतृत्व करणार आहेत. या आंदोलनावर राज्याचे मुख्यमंत्री देवेंद्र फडणवीस यांनी एका वाक्यात प्रतिक्रिया दिली आहे. लोकशाहीत प्रत्येकाला आंदोलन करण्याचा अधिकार आहे. फक्त आपण जे मुद्दे मांडत आहोत, ते किती खरे आहेत, हे एकदा तपासून पाहिलं पाहिजे, असा टोला देवेंद्र फडणवीस यांनी मीडियाशी संवाद साधताना लगावला आहे.

लोकशाहीत आंदोलन करण्याचा अधिकार आहे. कोण आंदोलन करत आहे, त्यावर टीका करणार नाही. ज्या मुद्द्यांवर आंदोलन करतो तो किती खरा आहे हे समजून घ्या. आपण जे उदाहरणं देतो. तेही समजून घ्या, असा टोला मुख्यमंत्री देवेंद्र फडणवीस यांनी लगावला आहे.

त्यांना फायदा देणार

मुंबईत आज उपवर्गीकरणाच्या समर्थनासाठी मातंग समाजाने मोर्चा काढला. त्यावरही त्यांनी प्रतिक्रिया दिली. उपवर्गीकरणाचा अभ्यास करण्यासाठी एक समिती स्थापन केली होती. या समितीने रिपोर्ट दिला आहे. त्यातून काही प्रश्न निर्माण झाले आहेत. विविध समाजाचे प्रतिनिधी मला भेटले होते, त्यांनी त्यांचे काही मुद्दे मांडले आहेत. या अर्जांचा विचार करण्यासाठी मुख्य सचिवांची समिती केली आहे. कोणतीही कार्यवाही करताना जाती जातीत तेढ निर्माण होणार नाही, याची आम्ही काळजी घेणार आहोत. ज्या लोकांना आरक्षणाचा फायदा मिळाला नाही त्यांना फायदा देण्याचा आमचा प्रयत्न आहे, असं फडणवीस यांनी स्पष्ट केलं.

ना परीक्षा, ना ट्रेनिंग

यावेळी त्यांनी अग्नीवीरांना महाराष्ट्रातील शासकीय सेवेत सामावून घेणार असल्याचं स्पष्ट केलं. अग्नीविरांच्या पहिल्या बॅचचा कार्यकाळ संपत आहे. महाराष्ट्रातील अग्नीवीर परत येणार आहेत. अग्नीवीरांसाठी केंद्राने एक निर्णय घेतला होता. 25 टक्के अग्नीवर हे सैन्यात राहतील. 75 टक्के अग्नीवीर हे केंद्र आणि राज्याच्या विविध फोर्सेसमध्ये घेतले जातील. पोलीस किंवा तत्सम पदं आहेत. त्या सर्व पदांवर या अग्नीवीरांना सामावून घेणार आहोत. त्यांच्यासाठी कोणतीही परीक्षेची अट नाही. ट्रेनिंगची अट राहणार नाही. ते परीक्षा आणि ट्रेनिंग देऊन आले आहेत. यंग आहेत. तरीही चार वर्षाची सूट वयात देणार आहोत, असं त्यांनी सांगितलं.

अग्नीवीर फायरमन म्हणून गेले तर त्यांना तीन महिन्याचं ट्रेनिंग एका वर्षात घ्यावं हे बंधन असणार आहे. पदं कमी पडले तर अधिसंख्य पदं निर्माण करणार आहोत. जेवढे अग्नीवीर येतील त्यांना सरकारी सेवेत सामावून घेणार आहोत. नेव्हीतील अग्नीवीरांना कोस्टल सेक्युरिटीत घेणार आहोत. अग्नीवीरांना 10 टक्क्यांचं आरक्षण दिलं आहे. माजी सैनिक कॅटेगिरीत पदं रिक्त राहतात. त्यावरही त्यांना घेणार आहोत. ज्या ज्या लोकांना शासनात काम करण्याची इच्छा आहे, त्यांच्या अनुभवांचा फायदा करून घेणार आहोत, असंही त्यांनी स्पष्ट केलं.