4 पक्ष, 4 हॉटेल, शेकडो आमदार आणि विधान परिषद निवडणूक, मुंबईच्या पोटात राजकारण शिजतंय
विधान परिषदेच्या 11 जागांसाठी येत्या 12 जुलैला मतदान होणार आहे. या निवडणुकीच्या पार्श्वभूमीवर आता राजकारण तापायला सुरुवात झाली आहे. विशेष म्हणजे या निवडणुकीत दगाफटका टाळता यावा यासाठी राज्यातील 4 प्रमुख पक्षांनी आपापल्या आमदारांना आजपासून मुंबईतील चार वेगवेगळ्या फाईव्ह स्टार हॉटेलमध्ये ठेवण्याचा निर्णय घेतला आहे. तसेच प्रत्येक पक्षाच्या गोटात आज महत्त्वाच्या बैठका देखील आयोजित करण्यात आल्याची माहिती सूत्रांकडून मिळत आहे.
विधान परिषद निवडणुकीच्या पार्श्वभूमीवर राजकीय वातावरण आता तापताना दिसत आहे. या निवडणुकीसाठी सर्वच पक्षांकडून जोरदार तयारी केली जात आहे. महाराष्ट्रातील 4 पक्षांच्या आमदारांची आता आजपासून हॉटेलवारी सुरु झाली आहे. चारही पक्ष आजच आपल्या आमदारांना हॉटेलमध्ये ठेवणार आहेत. भाजपच्या आमदारांची आज बैठक आयोजित करण्यात आली आहे. भाजप आपल्या आमदारांना ताज प्रेसिडेंट हॉटेलमध्ये ठेवणार आहे. दुसरीकडे शिवसेना शिंदे गट, ठाकरे गट आणि राष्ट्रवादी काँग्रेस अजित पवार गटही आपापल्या आमदारांना हॉटेलमध्ये ठेवणार आहेत. शिंदे गटाचे आमदार वांद्र्यातील ताज लँड हॉटेलमध्ये असतील. अजित पवार गटाचे आमदार द ललीत हॉटेलमध्ये असतील. शिवसेना ठाकरे गटाचे आमदार ITC ग्रँड हयात हॉटेलमध्ये राहणार आहेत.
भाजपकडून पक्षाच्या सर्व आमदारांची आज रात्री हॉटेल ताज प्रेसिडेंडमध्ये बैठक आयोजित करण्यात आली आहे. भाजप आमदारांना आजच्या बैठकीत मतांचा कोटा ठरवून दिला जाणार आहे. आमदारांसाठी आज रात्री पार पडणाऱ्या बैठकीत याबाबत सविस्तर माहिती दिली जाणार आहे. कुठल्या आमदाराने कुठल्या उमेदवाराला मते द्यायची याचे मार्गदर्शन आज होणार आहे. विशेष म्हणजे विधानपरिषद निवडणुकीची रंगीत तालीम उद्या होणार आहे. हॉटेल ताज प्रेसिडेंडमध्येच मतदानाची रंगीत तालीम उद्या पार पडणार आहे.
शिंदे गटात काय घडतंय?
विधान परिषद निवडणुकीच्या पार्श्वभूमीवर मुख्यमंत्री एकनाथ शिंदे यांनी आपल्या पक्षाच्या सर्व आमदारांची ताज लँड हॉटेलमध्ये बैठक बोलावली आहे. ही बैठक आज रात्री 9 वाजता आयोजित करण्यात आली आहे. या बैठकीला मुख्यमंत्री एकनाथ शिंदे हे स्वत: उपस्थित राहणार आहेत. विधान परिषद निवडणुकीच्या निमित्ताने आजची बैठक महत्त्वाची आहे.
ठाकरे गटात काय घडतंय?
ठाकरे गटाकडून आज विधानपरिषद निवडणुकीच्या पक्षाच्या सर्व आमदारांसाठी स्नेहभोजनाचं आयोजन करण्यात आलं आहे. परेल येथील ITC ग्रँड हॉटेल येथे हा स्नेहभोजनाचा कार्यक्रम आयोजित करण्यात आला आहे. पक्ष प्रमुख उद्धव ठाकरे देखील स्नेहभोजनासाठी उपस्थित राहणार आहेत. मुंबई पदवीधर आमदार अनिल परब निवडून आल्याने हे स्नेहभोजन अनिल परब यांनी आयोजित केल्याची माहिती आहे. याशिवाय 12 तारखेला विधान परिषदेची निवडणूक असल्याने आमदारांना हॉटेलमध्येच ठेवणार असल्याची माहिती मिळत आहे. ठाकरे गटाचे आमदार ITC गँड हॉटेलमध्ये आजपासून 12 जुलैपर्यंत राहणार आहेत.
अजित पवार गटात हालचाली काय?
अजित पवार गटात आज महत्त्वाच्या घडामोडी घडल्या. अजित पवार यांनी आज विधान भवनात त्यांच्या दालनात राष्ट्रवादी काँग्रेस पक्षाच्या सर्व आमदारांना तातडीने बोलावून घेतले. विधान परिषद निवडणुकीच्या अनुषंगाने यावेळी महत्त्वाची बैठक पार पडली. ही बैठक मतांचा राष्ट्रवादीचा कोटा निश्चित करण्याबाबतची बैठक असल्याची माहिती सूत्रांनी दिली. अजित पवार गटाच्या आमदारांना आता द ललीत हॉटेलमध्ये ठेवण्यात येणार आहे.
