संजय राऊत अब्रुनुकसान प्रकरणी मोठी बातमी, नितेश राणे यांच्याविरोधात कोर्टाकडून वॉरंट

अक्षय कुडकेलवार, Tv9 मराठी, मुंबई | 21 नोव्हेंबर 2023 : शिवसेना ठाकरे गटाचे खासदार संजय राऊत यांच्या अब्रुनुकसानीच्या दावा प्रकरणी भाजप आमदार नितेश राणे यांना वॉरंट बजावण्यात आल्याची माहिती समोर आली आहे. नितेश राणे यांना माझगाव कोर्टाने सुनावणीसाठी हजर राहण्याचं समन्स बजावलं होतं. पण माझगाव कोर्टाने समन्स बजावल्यानंतरही नितेश राणे सुनावणीला हजर राहिले नाहीत. त्यानंतर माझगाव कोर्टाकडून नितेश राणे यांच्याविरोधात बेलेबल वॉरंट जारी करण्यात आलं. त्यामुळे आता नितेश राणे यांना कोर्टात उपस्थित राहून जामीन घ्यावा लागणार आहे.

नितेश राणे यांच्याकडून 7 मे रोजी एक वक्तव्य करण्यात आलं होतं. येत्या 10 जूनपर्यंत संजय राऊत राष्ट्रवादी काँग्रेस पक्षात प्रवेश करतील, असं नितेश राणे म्हणाले होते. त्यांच्या या वक्तव्यावर संजय राऊत यांनी अब्रुनुकसानीचा दावा केला होता. याच प्रकरणी माझगाव कोर्टाने नितेश राणे यांना समन्स बजावले होते.

नितेश राणे यांच्याविरोधात बेलेबल वॉरंट

दुसरीकडे नितेश राणे यांनी कोर्टाकडून बजावण्यात आलेलं समन्स आपल्यापर्यंत पोहोचलं नाही, असं नितेश राणे यांनी सांगितलं आहे. नितेश राणे यांनी आज कोर्टात हजर राहणं आवश्यक होतं. ते कोर्टात हजर राहिले नाहीत तरी त्यांच्या वकिलांकडून उत्तर देणं अपेक्षित होतं. पण तसं काही झालं नाही. त्यामुळे कोर्टाने नितेश राणे यांच्याविरोधात बेलेबल वॉरंट जारी केलं आहे. त्यामुळे आता नितेश राणे यांना कोर्टात उपस्थित राहून जामीन घ्यावं लागणार आहे.

नितेश राणे यांच्याकडून संजय राऊतांवर टीका

नितेश राणे आणि संजय राऊत यांच्यात सातत्याने वाकयुद्ध रंगलेलं बघायला मिळतं. नितेश राणे यांच्याकडून सातत्याने संजय राऊत यांच्यावर सडकून टीका केली जाते. संजय राऊत यांनी नुकतंच एका कॅसिनोतला फोटो ट्विट केला होता. या फोटोवरुन नवा वाद निर्माण झाला होता. फोटोतील व्यक्ती भाजपचे प्रदेशाध्यक्ष चंद्रशेखर बावनकुळे असल्याची चर्चा होती. तर भाजपने त्यावर स्पष्टीकरण दिलं होतं. बावनकुळे आपल्या आयुष्यात कधीच जुगार खेळले नाहीत, असं स्पष्टीकरण भाजपकडून देण्यात आलं होतं. राऊतांनी ट्विट केलेल्या या फोटोवर नितेश राणे यांनी सडकून टीका केली होती.